Halve hallen betalt med dugnadsinnsats

– Det er kjempebra med ein så stor hall. Nå kan me trena så ofte me vil, og så kan me vera med i fotballturneringa Havdurknotten.

Erik Rege, Thomas Oftedal og Brian Hellestø er i kjempehumør. Endeleg står fotballhallen Stangeland Arena klar i Tjelta i Sola kommune.

– Me kjem til å vera med og spela fotball her ofte. Kvar helg, sikkert, seier gutane.

Eitt års byggetid

Første november i fjor starta arbeidet på hallen. Då hadde planlegginga pågått, av og på, i 12 år.

Eitt år seinare kan byggekomitéen registrere at det er gjennomført 6000 arbeidstimar på dugnad.

– Graving, massetransport, røyrlegging, kummar, beleggingsstein, asfalt, kunstgrasdekke, elektroarbeid, tømring, støyping, maling, fliselegging og gartnerarbeid. Alt dette har folk i bygda bidratt med, seier Magnar Helleland og Jan Klingsheim, som har vore viktige støttespelarar i byggekomitéen.

Rause opningstider

Hallen skal vera oppe kvar dag, sju dagar i veka. Først klokka 22.30 på kvelden blir dørene stengde.

• Les også: Mer enn 300 kroner skiller topp og bunn

– Me trur at det blir ein samlingsstad for heile bygda, spesielt for dei unge. Her blir det fotball mest døgnet rundt, seier Helleland og Klingsheim.

– Kva kjensler sit de att med nå, når hallen er ferdig?

– Glede, seier dei to. Men det blir truleg eit stort antiklimaks på måndag. Då sit me vel og tvinnar tommeltottar etter vanleg arbeidsdag, og funderar på kva me nå skal gjera, i staden for å gå ned her og arbeida til langt på kveld.

Alle stiller opp i sørabygdå

Ordførar Ole Ueland har sjølv budd på Tjelta, og han kjenner godt igjen dugnadstradisjonen som har gjort bygginga av Stangeland Arena mogeleg.

• Les også: Talet på arbeidsledige auka i oktober

– Det er ein draum som har blitt til ein realitet. For Sola kommune er det eit storarta anlegg, seier ordføraren.

Og det ha me bruk for, legg Ueland til.

– Sola er ein kommune i vekst og Tjelta er ei bygd i vekst, seier ordføraren.