Forventar tiltak mot arbeidsløysa på statsbudsjettet

Olje- og gassindustrien er inne i tøffe tider, og mange har sagt opp tilsette. Det fører til at også andre bransjar slit i Rogaland. Det merkast godt på kor mykje dei har å gjera på Nav-kontoret i Bjergsted i Stavanger.

– På eige kontor har me hatt ein auke på over 100 prosent på eit år, seier leiar Stig Veland.

• LES OGSÅ: 70 prosent flere arbeidsledige på ett år

– Ikkje nok ressursar

Frå å vera blant fylka med lågast arbeidsløyse, er det i dag berre Aust-Agder som har fleire ledige enn Rogaland. Rundt 1000 personar har per i dag meldt seg arbeidsledige berre ved dette Nav-kontoret. For eitt år sidan var talet om lag 400. No tilset Nav Rogaland fleire for å handtera auken. Veland er spent på kva det nye statsbudsjettet vil gi dei ekstra for å takla situasjonen endå betre.

– Det er klart at me ikkje har fått tilført nok ressursar per i dag til å takla den auka pågangen, seier Veland.

• LES OGSÅ: Slik har regjeringen solgt inn budsjettet

– Det kjem for seint

Klokka 10 i dag blir statsbudsjettet lagt fram. Regjeringa har blant anna lova milliardar til opprusting av offentlege bygg og infrastruktur for å få folk i arbeid. Størstedelen av desse pengane skal gå til Sør- og Vestlandet.

– Dei har sagt dei skal koma med kraftige verkemiddel mot arbeidsløysa. Dei har me ikkje har sett endå. No ser det ikkje ut til at det kjem noko før statsbudsjettet trer i kraft den 1. januar, seier Øystein Hansen, fylkesleiar i LO.

Også NHO-leiaren i Rogaland, Hallvard Ween, forventar to ting som kan få fart på sakene.

– Eg forventar ein del grep som gjer at me kan få fart på hjula på ein annan måte. Me har peikt på dette med midlar til utvikling, forsking og nye prosjekt, seier Ween.

– Det andre er det me har snakka om lenge: samferdsle, seier han.

• LES OGSÅ: Jensen vil gi ni av ti lavere skatt

Røper ingenting

Leiaren av arbeids- og sosialkomiteen på Stortinget, Arve Kambe, vil ikkje røpa noko i timane før presentasjonen av budsjettet. Men han seier at folk i Rogaland kan venta seg dette:

– Det er først og fremst eit budsjett som skal bidra til aktivitet, arbeid og omstilling. Det kjem til å koma ein veldig stor vedlikehaldspakke prioritert til Rogaland, Hordaland og Agder-fylka, seier Kambe.

Tidlegare har Helseminister Bent Høie (H) har allereie varsla at sjukehusa skal få pengar til å pussa opp for å stimulera byggebransjen .

– Er dette dei same pengane?

– Statsbudsjettet er endå ikkje vedteke, så dei pengane vil bli vedteke av Stortinget når det kjem. Noko skal til Stavanger og noko skal til Haugesund når det gjeld sjukehusa, er alt Kambe vil svara på det spørsmålet.