Blei millionærar på gründerselskap

Det byrja i ei kjellarstove på Ganddal i Sandnes. Erik Stokkeland hadde fått feriepengar og brukte opp det meste på eit avansert heimekinosystem.

– Då lærte han at det blei altfor mange fjernkontrollar å halde orden på, fortel Sigbjørn Groven, som også er ein av dei fire gründerane.

Det var det første steget på veg mot selskapet Futurehome. Selskapet som nå tilbyr ei internettbasert løysing for styring av mellom anna solskjerming og innetemperatur i hus og leilegheiter.

• Les også: Framtidshuset på plass i butikken

Suksesshistoria

Fredag blei det klårt at Get-konsernet har kjøpt opp 51 prosent av selskapet. Ingen av partane vil seie kor mykje som er betalt for kjøpet. Get er mest kjent for å vera ein internett- og kabel-TV-leverandør.

– Me har samarbeida med Futurehome i to år nå. På den tida har me funne ut at deira tekniske løysing er den beste plattforma for oss å satse på vidare, seier direktør for samfunnskontakt i Get, Øyvind Husby.

Get har som mål å bli ein viktig leverandør til smarthus i framtida på området Internett of things (IoT). Det inkluderer også blant anna brann og innbrotsalarmar.

Gründerlivet

Dei fire gründerane frå Stavanger-området viste igjen første gongen då dei samla inn 1,5 millionar kroner i startkapital gjennom crowdfunding (crowdfunding er når enkeltpersonar går saman om å støtte eit prosjekt).

Gjennom eit opplegg på nettsida si fekk dei massevis av folk til å førehandsbetala, mot at dei skulle få produkta levert etter kvart.

• Les også: Future Home fikk inn over en million fra ukjente for god forretningside

Deretter har dei utvida til 18 tilsette og fått avtalar med fleire bustadbyggingsselskap.

Trass i salet av selskapet i dag, så er det ikkje noko stor feiring på gang.

– Me er ikkje så gode til å stansa opp og klappa oss sjølve på ryggen, seier Groven. Når me har nådd eitt mål, er me raske til å konsentrera oss om det neste, seier han.

Framtida

Nå har Futurehome seld 51 prosent av aksjane. Dei fire gründerane har blitt millionærar og dei har langt på veg lukkast med det som berre var ein idé for fem år sidan. Men det er det lite snakk om.

• Les også: Fra Stavanger til Texas for å bli smartere – fikk råd av president Obama

– I dag leverer me løysinga vår til 1500 familiar. Om fem år skal det talet vera 250 000, seier salssjef i selskapet, Sigbjørn Groven.

Og når det gjeld venskapen mellom dei fire, så meiner Bjarne Handeland at dei skal klare å halda på den.

– Av og til har me vore usamde, men me klarer å løysa det på ein profesjonell måte. understrekar han.