Det er framleis ei stund att til jul, sjølv om julemarsipanen snart er på plass i butikkane. Men også i Bjørheimsbygd i Ryfylke i Rogaland er julesesongen i gang, der har dei starta juletrehogsten før kalenderen syner oktober.
Dubai er kanskje ikkje den første staden du tenkjer på når du høyrer orda jul og juletre. Men det er nettopp dit 300 juletre frå Bjørheimsbygd i Ryfylke no skal sendast.
Dubai er offisielt ein muslimsk stat, men jul og julepynting er ikkje uvanleg på grunn av mange utanlandske innbyggjarar.
Disney-tre
– Eg fekk ein telefon frå Dubai på gebrokkent engelsk om me hadde normannsgran. Sjølvsagt har me det, seier juletreprodusent Olav Ravnås.
Dermed var eit nytt eksporteventyr, om så endå av det beskjedne slaget, i gang i Rogaland. Bestillinga var 300 juletre levert til eit hagesenter innan 20 november.
Sidan den gong har juletreprodusenten rusla mykje blant dei tusenvis av juletrea han har for å finne dei som kan slå best an i Saudi-Arabia.
– Det er eit Disney-tre, som me seier, altså som har fin symmetri. Dei er litt for breie for Norge, men for Dubai skal dei vera fine.
– Folk har for små stover i Norge, i Dubai har dei slike svære palass. Då har dei plass til store tre, seier Ravnås med glimt i auget.
40 dagar til sjøs
Her heime er det mange produsentar som slåst om kundane, og prisen blir pressa nedover. Så produsentane er stadig på utkikk etter eksportmoglegheiter. No har dei fått ein ny marknad, men då må trea tole ørken og høge temperaturar i Arabia, etter 40 døgn reise om bord i eit skip:
– Nå blir dei sendt ned i kjølecontainer med is. Men så er spørsmålet korleis dei tek seg av trea der nede. Viss dei klarer å halda seg fine, så kan dette bli ei skikkeleg eksportvare for oss, seier Mikael Hetland i Norsk Juletreservice, som består av 35 produsentar i Ryfylke og Hardanger.