Difor er det vanskeleg å få tak i popkorn nå

– Eg hadde aldri trudd den skulle bli så stor!

Vivian Klovning er ei av mange som har kasta seg på popkorngras-trenden.

Ho har ein teori om kvifor det har blitt så populært.

– Det er dyrt å kjøpe planter, og viss du vil ha noko stort må du nesten opp i tusenlappane. Det er mykje lettare å berre kjøpe ein pose popkorn på butikken, seier ho.

For popkorngras dyrkar du enkelt ved å så upoppa popkorn tett i tett i ei krukke med jord.

Men å få tak i popkorn er ikkje like enkelt.

• Å la grasklipparen stå er ein annan stor hagetrend i år.

Kjøpmann har «registrert at det har gått ein del»

– Vi har vore tomme i to veker, seier butikkmedarbeidar Veronica Tjelle på Coop Obs i Haugesund.

Ho har høyrt at mange andre butikkar er tomme også. NRK har fått det bekrefta fleire stader i fylket.

Tjelle er glad ho sikra seg ein av dei siste pakkane.

– Eg har sådd, men det har ikkje kome noko gras ennå, ler ho.

Det spirer meir heime hjå ein kjøpmann hos Rema 1000.

– Eg har registrert at det har gått ein del popkorn, men ikkje visst kvifor. Men når eg tenker meg om, har kona sådd popkorngras på terrassen, seier Vidar Mæland på Rema 1000 i Haugesund.

• Vil du dyrke noko du kan ete, finst det mange tips å hente her.

Stod klar då butikken fekk inn popkorn

Dennis Asbjørnsen held foredrag, skriv bøker og deler hagetips på Spiselig hage på Instagram.

Han kan ikkje huske at ei plantetrend har blitt så populær som popkorngraset.

– Eg trur denne har tatt av på grunn av utsjånaden til planten, at den veks fort og fordi du får ei så stor plante av ein billig pose popkornfrø.

Popkorngraset spirer hos Asbjørnsen også, men han måtte jobbe for å få tak i hovudingrediensen.

– Her eg bur, er det seks butikkar. Alle var tomme, så det enda med at eg måtte spørje når dei fekk nye varer og stå klar då dei kom, seier han.

– Det er meir mikropop igjen i butikkane. Kan ein bruke det?

– Det har eg ikkje prøvd. Men det inneheld så mykje salt og smør at eg ville nok brukt dei naturelle, seier han.

• Humlene gjer ein viktig jobb, men visste du at det blir laga humler i eit fjøs på Jæren?