Gratis skulemat er eit tema som ofte er oppe til heftig debatt.
Det er også svært etande for den nye regjeringa, sidan alle parti til venstre for Pasientfokus har programfesta å kjempe for gratis mat på norske skular.
I Hurdalsplattforma legg dei fram at gratis skulemat gradvis skal bli innført.
Dei vidaregåande skulane i Rogaland har allereie hatt gratis frukost til sine elevar i to år.
Men ei ny evaluering syner at det berre er 17 prosent av elevane som jamleg dreg nytte av tilbodet.
Ein av tre tek imot gratis mat av og til.
– Tilbodet kunne vore betre
– Frukost er frukost, for å sei det slik.
Sam Gritc er av dei som et frukost på skulen nesten kvar dag. Elevane tykkjer om at det i det minste er eit tilbod.
– Det kan vere stress for mange å ete frukost om dei ikkje rekk bussen og slikt.
Om utvalet hadde vore noko meir variert, trur Gritc fleire av elevane hadde drege nytte av tilbodet.
– Det er ikkje alle som likar graut, so.
- Les også:
Vil lære meir
Solveig Ege Tengesdal, leiar av opplæringsutvalet i fylkestinget i Rogaland, tykkjer at statistikken ikkje er so gale.
– Eigentleg er det bra. Det er jo nærare 2000 elevar ved dei vidaregåande skulane som dreg nytte av det, seier Tengesdal.
Ho trur endå fleire kunne tenkt seg å få gratis mat, men trur fylkeskommunen har ein jobb å gjere med å informere elevane.
– No ser vi på moglegheita for å få det inn som eit spørsmål i Ungdata-undersøkinga.
Ungdata er ei landsdekkande årleg undersøking av elevar frå mellomtrinnet til vidaregåande opplæring.
Gjennom å gjere skulemat eit tema her, vonar Tengesdal å få meir informasjon om kva born og unge ynskjer av skulen.
- Les også:
Meir dialog
– Eg tenkjer at elevane gjerne må kome litt meir på bana og sei kva dei ynskjer. Kanskje vi kan jobbe litt meir saman for å auke den delen, seier Jan Arvid Thorsen.
Han er kantinesjef på Jåttå vidaregåande og trur statistikken kan bli mykje betre.
– Eg trur det er vegen å gå: Litt meir dialog, so skal vi fikse dette her, seier han.
Ordninga i Rogaland har no hatt ei midtvegsevaluering, og skal halde fram til 2023.
Tengesdal seier ho forventar nasjonale midlar frå den nye regjeringa til å vidareutvikle og lære meir om gratis skulemat, for slik å vere med å legge til rette for nasjonal politikk.