– Vi får mange bekymra meldingar, seier Vidar Schei.
Han er avdelingsleiar i Fellesforbundet i Fredrikstad.
Dagleg blir han ringd av tilsette i byggjebransjen som ber om hjelp. Dei skal på møte med leiinga.
Jobben står på spel.
Det kan bli oppseiingar eller permitteringar.
For salet av nye bustader har gått kraftig ned. Då blir det lite nytt som skal byggjast.
Arbeidsløysa aukar
I Østfold er det selt 393 nye bustader så langt i år. Det er 48 prosent mindre enn på same tid i fjor.
Nybygginga er også nær halvert. Sidan nyttår er det starta på 419 bustader, viser tal frå Byggenæringens Landsforening (BNL).
– Situasjonen er alvorleg. Høge byggjekostnader og høge renter har ført til svikt i bustadmarknaden, seier administrerande direktør Nina Solli.
Boligbyggingen er lågare enn under finanskrisa, dersom vi korrigerer for folketalsveksten, seier Nina Solli, administrerande direktør i Byggenæringens Landsforening.
Foto: Byggenæringens LandsforeningI heile landet var 7.900 i bygg- og anleggsbransjen utan jobb i oktober. I desse yrka aukar arbeidsløysa mest, ifølgje Nav.
Berre blant tømrarar og snikkarar har det vorte 1.100 fleire utan jobb på eitt år.
Mot mørke tider
I Viken ventar to av tre bedrifter i BNL at situasjonen blir verre. Dei har færre oppdrag på vent.
Vidar Schei i Fellesforbundet ser også at det går mot mørkare tider.
I oktober var 1000 tilsette i bygg- og anlegg permitterte. No fryktar fagforeininga fleire.
– Eg trur nokon får varsel om permittering i julegåve i år.
Avdelingsleiar Vidar Schei i Fellesforbundet trur nedgang i nybygging kan få store ringverknader.
Foto: Even Bjøringsøy Johnsen / NRKSolli i BNL er redd for at bedriftene kan bli nøydde til å gå rett på nedbemanning.
Ho meiner det ikkje er betring i sikte dei neste 26 vekene. Og 26 veker er det lengste ein tilsett kan vere permittert.
Permittering i eitt år
Både Fellesforbundet og BNL meiner derfor perioden for permittering må aukast til eitt år.
Målet er å behalde fagfolk, forklarer den administrerande direktøren i BNL.
– Så fort renta har stabilisert seg og byrjar å gå ned, blir det aktivitet i byggjenæringa igjen. Difor treng vi å behalde fagkompetansen.
Men ho fryktar det kan bli full stans før det snur.
BNL og Fellesforbundet ber derfor om at det mellom anna kjem meir pengar til Husbanken i statsbudsjettet for neste år. Fredag startar regjeringa forhandlingane om budsjettet.
Schei i Fellesforbundet meiner regjeringa bør gi kommunar nesten rentefrie lån
–Vi må få i gang byggjebransjen, få opp aktiviteten.
