Ráidu mas dat lea sáhka, lea dat man Aftenposten almmuha dán vahkus. Doppe mii oahpásmuvvat 15 nuorain geat orrot iešguđet báikkis Norggas.

Okta dain nuorain lea Kárášjot-nieida Lisa Marie Skum. Son lei dušše 15 jahkásaš go šattai eadnin. Dat ii leat álo leamaš nu álki, ja dan birra son muitala dán filbmaráiddus.

• Geahča maid: Vanskelig å være ung mor og student

– Mun muitalan iežan vásáhusaid birra, ja mo lea eallit nuorra eadnin. Kárášjohka lea oalle unna báikkáš, ja mun muitalan mo márkanis leat mu vuostá láhtten, lohká Lisa.

Dego johtti plakáhtta

Lisa portreahtas son beassá muitalit ahte lea leamašan lossat dalle go lei áhpeheapme, ja muđui leat nuorra eadnin. Leat leamaš sihke positiiva ja negatiiva bealit, muhto várra eanemus negatiiva.

– Mun vázzen márkanis iežan stuorra čovjjiin, ja oidnen movt olbmot savkkástallet nubbi nubbái. Mun orrun dego plakáhta jođus, lohká Lisa.

Nuorra váhnemat gal birgejit

Son muitala ahte lei veahá balus go searvvai dán filbmaráidui, ja ahte son ii leat diekkár gii liiku fuomášupmái.

• Loga maid: Son šattai árrat rávásmuvvat

– Mun lean gal veahá balus dál, maid olbmot lohket go ráidu almmuhuvvo. Muhto olbmot fertejit muitit ahte eallin ii bisán váikko oažžu mánná, lohká Lisa. – Lea hui máŋggas geat omd. oaivvildit ahte váhnemat eai galgga vuolgit suohtastallat ovttas olbmáiguin. Mu mielas dat lea áibbas boastut.

– Manne servet dán filbmaráidui?

– Lei meastta bákkus ahte mun serven dása. Muhto mun maid jurddašan ahte lea oalle dehálaš ahte olbmot besset gullat movt dat lea, goit ge Kárášjogas. Doppe leat mu dulbmon, ja sii leat vuordán ahte mun in birge iežan mánáin ja ahte mun heaittán skuvlavázzimiin. Mun sávan ahte olbmot fuomášit ahte mii nuorra váhnemat birget, jus mii duođai háliidit dan.