Lisa Marie Skum lei 14-jahkásaš go šattai áhpeheapmen. Odne son lea eadni 3- jahkásaš niidii Leah Michellii.

Sudno árgabeaivi ii leat earálágan go earáid. Lisa vázzá dál 3. jagi joatkkaskuvlla Kárášjogas ja Leah ges lea mánáidgárddemánná.

- Mus lei measta bággu šaddat ollesolmmožin go ii orron šat heivemin láhttet justa nu mo háliidin, go 15-jahkásaččas leat veahá eará oainnut go rávisolbmos, muitala Lisa.

Go mánná šattai, de váccii Lisa 10. luohká, ja lávii maid muhtomin váldit máná skuvlii mielde. Skuvlaoappát ja -vieljat veahkehedje sudno skuvllas iige lean mihkkege váttisvuođaid máná váldit mielde, lohká son. Go joatkkaskuvli álggii, de gal mánná maid álggii mánáidgárdái.

- Mu nuorravuohta gal lea liikká bistán vaikko vel leange máná ožžon nuorran. Lean dušše šaddan smiehttat veahá earáláhkai, váikkuhusaid, plánet čielgasit ja álo heivehit máná ektui.

- Oažžut máná lea lihkku mii lea čilgemeahttun, mánná lokte du árgabeaivvi, go don dieđát ahte lea álo okta gii vuordá ja váillaha du. Olmmoš nu čadno mánnái ja dagašii buot ahte mánás galgá leat buorre dilli.

- Leah Michelle lea buot divraseamos munnje, ja su dihtii gomihivččen máilmmi.

Guldal eanet maid Lisa Marie muitala: