Dábálaččat lea báhppa, gii náitá báraid Sámis, muhto Leammuid Lemet Ánde (Lemet Ánde Stueng) ja su náittosguoibmi Jørgen Starbro Henriksen eaba háliidan nu náitalit.

Soai baicca manaiga duopmára lusa guhte celkkii sudnuide ovttaseallinduomu.

Kárášjohkalaš lei áigá mearridan ahte son áigu farggamusat náitalit go gávdná irggi.

Jagi maŋŋel go álgalii Jørgeniin de leigga juo dubmejuvvon náittosdillái, diggevisttis golggotmánu 28. beaivve dán jagi.

Girkus eaba háliidan náitalit, danne go Jesusa, Mohammeda dahje Buddha eaba dáhtton seaguhit iežaska ráhkisvuođa eallimii.

– Duopmár dubmii

Lemet Ánde leaikkastallá dainna go lei duopmár gii náittii sudno, lohká ahte son lea dál duomu vuolde eallimin. Duohtavuođas sudnos lei fiinna ávvubeaivi iežaska fulkkiiguin.

Son lei guossin Dáppe Dál -sáddagis. Guldal go Lemet Ánde muitala iežas náittosdili birra.

Movt lea dudno náittosdilli?

Lemet Ánde ii loga vuos vuohttán stuora erehusaid maŋŋel go náitalii. Dat áidna maid lea fuomášan lea ahte dál sus leat ollu ođđa fuolkkit geaiguin deaivvadit.

Juridihkalaš dorvvu dihte soai válljiiga lávket dán dillái, lohká Stueng.

Geahča sudno Studio Sámis

Lemet Ánde ja Jørgen leaba guossin min TV-ráiddus, Studio Sámis, mii oidno NRK Sámi neahttasiiddus lávvordaga 19.11.16.

Dan sáddagis oainnát maid Slincraze ja Maria Mikkelsena.