Homofile tør ikkje stå fram på jobb

Dei stilte til debatt i Ukeslutt på NRK P1 og P2 .

Diskriminert i Se og Hør

Ein journalist i Se og Hør sa nyleg at han hadde fått beskjed om å opptre mindre homofilt i jobbsamanheng. Dette fekk Likestillings- og diskrimineringsombodet til å opprette sak.

Lesbiske Anette Trettbergstuen, som er stortingsrepresentant for Arbeidarpartiet, er glad for at journalisten gjekk ut med historia si.

- Mange opplever å bli mobba på arbeidsplassen på grunn av legninga si, og nokre opplever å forbigått ved forfremmingar. Det viktig å setje søkelys på dette, seier ho.

Ei undersøking frå i fjor, gjort av Nova på oppdrag for LO, viser at arbeidsplassen er ein stad der mange lesbiske og homofile møter diskriminering.

4 av 10 homofile meiner sjølv at legninga deira er til hinder for karrieren. Dermed vel dei å ikkje stå fram.

- Homofile kan ta stor plass

Adam Schjølberg er kjent frå tv-serien Homepatruljen. Han forstår at enkelte homofile kan ta litt mykje plass i kontorlandskapet, men han meiner det har med personlegdom å gjere og ikkje seksuell legning.

- Det kan vere slitsamt å ha folk på jobb som gjer veldig mykje av seg i arbeida, men det har ingen ting med homoar å gjere, det gjeld folk med alle slags legningar, seier han.

Kai Thomas Ryen Larsen synes det er synd at mange er redde for å vere opne om legninga si. Samtidig opplever han at homofile har det godt i Noreg.

Sjølv vart han kåra til Mr. Gay Norway og har vore i Budapest i samband med dette.

- Då eg såg korleis dei homofile hadde det der, forsto eg vi har det bra i Noreg. Kanskje ein opplever litt diskriminering på jobben, men vi får ikkje bombetruslar og slepp å vere livredde for å stå fram som homofile, påpeikar han.

"Skrullehomsen"

Heile 83 prosent av dei som har stått fram som homofile på arbeidsplassen har opplevd dette som positivt. Frykta for å stå fram er større en den burde vere, meiner Trettebergstuen.

- Det har samanheng med at media stort sett berre skriv om dei problematiske og sprøe historiene når dei lagar saker om homofile, seier ho.

I Homsepatruljen fekk Schjølberg i oppgåve å spele ”skrullehomsen”. Han stal dermed det meste av showet.

- Dei fire andre fekk mindre fokus. Minst merksemd fekk han som alltid gjekk med joggebukse og aldri børsta håret. Media byggjer i stor grad opp om stereotypiar, stadfestar han.

Larsen er samd i at media skapar eit feil bilete av homofile.

- Media skriv om det spektakulære, og skapar frykt for det ukjente. Folk forstår ikkje at vi er heilt vanlege folk, seier han.

Homofili i skulen

Trettebergstuen opplever ingen problem med å vere lesbisk stortingspolitikar. Ho meiner det blir viktig å setje fokus på homofili i skulen.

- "Homo" er framleis det mest bruke skjellsordet i skulegarden. Skulene og arbeidsplassane blir ein viktig kamparena framover, seier ho.

- Vi har ein lang veg for å få aksept. Ein bør lære meir om homofili i skulen. Då vil frykta bli broten ned mykje raskare, seier Schjølberg.