Kommunikasjonssjef Gina Scholz i NSB har lite trøyst å kome med til togpassasjerane.
– Vi oppmodar alle dei som kan om å ta ut ferie i perioden det er buss for tog. Men det er ein utfordrande situasjon. Vi opplever passasjervekst over mange år, så det er svært mange reisande vi skal gi eit alternativ, seier ho.
I fjor sommar kjøpte NSB over 33.000 bussavgangar for tog. Det blei kalla ekstremt. Denne sommaren blir det dobbelt så mange avgangar med buss for togpassasjerane. Det betyr i praksis at over 400 bussar vil vere ute i trafikken på same tid, for at pendlarar og andre togpassasjerar skal kome fram.
Verst på Austlandet
Det er det sentrale Austlandsområdet som blir hardast ramma, spesielt Drammenbana og Østfoldbana. På strekninga Asker-Drammen blir det buss for tog frå 22. juni til og med 5. august, altså seks veker.
Frå 6. juli til 22. juli blir det stengt også mellom Skøyen og Asker. Då vil det vere heilt stengt frå Skøyen til Drammen.
Gina Scholz fortel om krevjande logistikk.
– Ein ting er kor mange bussar vi treng, men dei skal ut i ein trafikk som er tett frå før, så det er klart at dette blir krevjande, seier ho.
– Best for passasjerane
Det er Bane Nor som har ansvaret for skjenegangen, og dermed også for arbeidet som skal gjerast. Det er vedlikehald av Lieråstunnelen på Drammenbana og arbeidet med Follobana som fører til at togpassasjerane må over på buss i Intercity-området.
Pressesjef Thor-Erik Skarpen i Bane Nor seier at dette er arbeid som må gjerast i sommarferietida.
– For passasjerane er det ein stor fordel at strekninga er stengt når dei er på ferie og ikkje når dei er på jobb, seier han.
Her blir det buss for tog
Drammenbanen/Vestfoldbanen:
Asker–Drammen Veke 26 – 31
Skøyen–Drammen Veke 28 og 29
Spikkestadbanen Veke 28 og 29
Østfoldbanen:
Veke 21: Laurdag 25.5 kl. 02 – søndag 26.5 kl. 14
Oslo S-Kråkstad og Oslo S-Ed (i Sverige).
Oslo S-Rygge-Mysen er stengt laurdag og søndag veke 25.
Veke 26 køyrer toga Oslo-Kolbotn, men det er stengt Kolbotn-Rygge og Kolbotn-Mysen/Rakkestad.
Laurdag og søndag veke 26 er Oslo-Rygge og Oslo-Mysen/Rakkestad stengt.
Veke 27–31: Østre linje er stengt Oslo S–Mysen/Rakkestad.
Veke 27–31: Vestre linje er stengt Oslo S–Rygge.
Bergensbanen:
Veke 26–31. Bergensbanen køyrer over Roa, buss for tog Drammen – Hønefoss.
Sørlandsbanen:
Veke 21: Måndag-fredag mellom 0930–1430 mellom Drammen og Kongsberg
Veke 26–31: Buss for tog Kongsberg – Oslo
Gjøvikbanen:
Veke 21:
Måndag-fredag kl. 09–1530. Gjøvikbanen mellom Roa og Jaren
Laurdag 25.5 kl. 01–søndag 26.5 kl. 11 Gjøvikbanen Oslo S-Gjøvik
Dovrebanen:
Veke 21: Laurdag 25.5 kl. 02–måndag 27.5 kl. 07 Eidsvoll-Trondheim
Nordlandsbanen:
Veke 21: Laurdag 25.5 kl. 02–måndag 27.5 kl. 07 Trondheim-Lilleby/Leangen.
OBS! Alle togoperatører vil bli berørt av arbeider på forskjellige strekninger. Det betyr at også Flytoget er berørt når det er arbeider mellom Asker og Drammen. Også godstog berøres ved arbeider.
Kjelde: NSB og BaneNOR