Ein kortserie på til saman 26.000 kort hos DNB er forsøkt svindla. Det opplyser bankens kommunikasjonsrådgivar Andreas Nyheim til E24.
– Ingen kundar har lidd økonomiske tap. I dei få tilfella der transaksjonen har gått gjennom er dei blitt reverserte, slik at summen blir ført attende til dei kundane det gjeld, seier Nyheim.
Svindlarane skal ha forsøkt å svindle til seg små summar på nokre få kroner.
Tek heile ansvaret
Overfor NRK seier Nyheim at kundane ikkje kan skuldast i denne saka, men at det samstundes er viktig at dei er på vakt mot svindlarar.
– I denne saka er kundane heilt uskuldige offer. Vi ynskjer likevel å bidra til god folkeopplysning, slik at folk er merksame på framgangsmåten og ikkje går i fella, seier han og utdjupar:
– Man bør ikkje svare på e-postar som bed ein om å gje frå seg kortinformasjon, Bank ID eller fødselsnummer. Ingen bankar eller seriøse aktørar vil spørje om dette i ein e-post.
DNB seier dei har kontroll
Feilen som vart oppdaga onsdag føremiddag er no teken hand om, opplyser Nyheim.
-– Me har hatt kontroll på saka sidan i føremiddag, og sette i verk nødvendige sikkerheitstiltak då.
Rådgivaren fortel samstundes at digitale svindelforsøk vert stadig meir utbreidde.
– Generelt sett er det slik at digitale bedrageri er ein stor og urovekkjande trend. DNB set inn store ressursar på å hindra og førebyggja den type svindel i å skje, og å hindra at kundane tek skade av det, seier han.