Skal kutte ein milliard: Ber pasientar og tilsette førebu seg på ny kvardag

Økonomien i Helse Møre og Romsdal er i krise. I løpet av tre år skulle føretaket kutte nesten ein milliard kroner.

No ser dei at det ikkje er mogleg.

– Det er ei heftig utfordring, seier nyvalt styreleiar Herlof Nilsen etter styremøte i Helse Møre og Romsdal i dag.

No ber helseføretaket om å få lengre tid til å gjennomføre kutta.

Styreleiaren seier at både pasientar og tilsette må førebu seg på ein annan kvardag enn det dei har i dag.

Varslar fleire kutt

Helse Møre og Romsdal skal kutte 467 millionar i løpet av 2025. Det er 170 millionar meir enn først venta.

Før møtet i dag var det varsla at det skulle kome meir konkrete kutt. Men møtet gav ingen klare svar.

– Vi ser på sengepoststruktur og talet på årsverk, og prøver å redusere dei med ulike tiltak, seier administrerande direktør Olav Lødemel.

Lødemel seier at dei må kutte i stillingar på alle klinikkar i fylket.

Foretakstillitsvalt for overlegeforeininga i Møre og Romsdal, Igor Jokic, seier situasjonen er alvorleg.

– Det er vanskeleg å sjå kor ein skal ta desse årsverka. Alle jobbar på spreng, det er mykje overtid og oppgåver som står i kø, seier Jokic

I Ålesund har dei fått beskjed om at ein kan miste karkirurgisk, urologisk, nyre og hjartemedisinsk bakvakt, som kan bety at pasientar må flyttast ut av fylket.

I tillegg til kutt i årsverk har helseføretaket også innført forbod mot overtid som ikkje er planlagt. Alle nye stillingar må godkjennast av administrerande direktør. Det er også vurdert bruk av kunstig intelligens for å effektivisere konsultasjonar.

– Betalar prisen

Nytt sjukehus på Hjelset og eit nytt bygg for akutt, intensiv og operasjon i Ålesund blir trekt fram som ein del av grunnen til det store underskotet. Sprengte budsjett i innføringa journalsystemet Helseplattforma er også del av skulda.

No må pasientar og tilsette betale prisen, seier Jokic.

– Det er leit og urovekkande, særleg når vi veit årsaka til at vi er der vi er i dag. Det er utelukkande Helseplattforma og dei nye bygga, seier han

Før møtet kritiserte dei tillitsvalde i Møre og Romsdal måten kuttprosessen har skjedd på.

– Eg veit framleis ikkje kva det betyr for oss. Vi har ikkje fått nokon detaljar, seier Jokic.

Helse Møre og Romsdal bruker konsulentselskapet Deloitte for å hjelpe dei med forslag til kutt. Kor mykje pengar dei brukar på dette vil dei ikkje svare på.

Beklagar

Administrerande direktør Olav Lødemel beklaga at dei tillitsvalde ikkje hadde fått god nok informasjon i forkant av møtet.

– Det var krevjande i denne saka. Så skal vi snakke vidare på ein god måte. Det kan ein garantere, seier Lødemel.