Ledig kapasitet
Som ledd i strategi- og omstillingsarbeidet i Helse Midt Norge RHF, Helse Sunnmøre HF og Helse Førde HF har det vore utført ei utgreiing av kapasitet og pasientgrunnlag for bestemte pasientgrupper på tvers av fylkesgrensa.
Utgreiinga viser at fødeavdelinga i Volda har ledig kapasitet til å ta i mot pasientar frå Nordfjord sjukehus.
Ved eit eventuelt samarbeid mellom Helse Sunnmøre og Helse Førde vil dei som ventar ukompliserte fødslar i kommunane Eid, Vågsøy, Selje, Stryn og Hornindal kunne overførast til Volda sjukehus.
I utgreiinga heiter det at det er sannsynleg at nokre fødande gjennom Fritt Sjukehusval vil velje å føde i Førde framfor i Volda. Dett gjeld i særleg grad for fødande i delar av Stryn.
Samhandling
Konklusjonen i utgreiinga slår fast at for at samhandlinga rundt desse pasientgruppene skal lukkast bør mellom anna bindande avtaler utarbeidast. Ein felles koordineringseining bør etablerast og ein må sjå på økonomiske, kapasitetsmessige og bemanningsmessige konsekvensar. Til slutt blir det peika på at fagleg kvalitet også er ein viktig faktor.
Utgreiingsarbeidet har vore gjennomført av PricewaterhouseCoopers i nært samarbeid med fagmiljøa i Helse Førde HF og Helse Sunnmøre HF.
