Eks-Molde-kaptein rosar Godset

Han har spelt 172 kampar som midtstoppar for Molde, mellom 1994 og 2002. Fire av desse åra var han kaptein. Han har i tillegg scora 13 mål for klubben.

Knut Anders Fostervold er ekte moldensar, men det er ikkje hat eller «hat» som gjer at han håper Rosenborg ikkje oppnår suksess.

– Dei har hatt ressursar opp gjennom som andre klubbar berre kan drøyme om. Andre lag kan no vise at det går med andre verkemiddel, meiner Fostervold.

Fryktar Rosenborg i haust

Tetkampen i Tippeligaen tetnar stadig meir til. Dersom Molde slår Vålerenga i dag søndag tek dei føringa i årets sesong, då Strømsgodset måtte dele poenga mot Lillestrøm i Drammen laurdag.

Bak Molde og Godset følgjer derimot Rosenborg hakk i hel. Og dersom den regjerande seriemeisteren taper på heimebane, kan trønderane gå forbi erkerivalen i det sesongen er to tredjedelar ferdig.

– Rosenborg har kome sterkt utover i sesongen. Dei blir nok med heilt inn, samtidig som Godset ikkje gjev seg utan kamp. Det blir tett, trur Molde-midtstoppar Vegard Forren.

– Kven fryktar du mest i augneblinken?

– Per dags dato ser nok Rosenborg farlegast ut, seier Forren, og refererer til RKB-kjøp som Tarik Elyounoussi, Tore Reginiussen og Mikkel Diskerud, samtidig som Strømsgodset har fått kaptein Alexander Aas skadd.

Saka held fram under bildet.

– Imponerande og spennande i Drammen

For Fostervold ser ting meir ope ut.

– Men moglegheita for Tippeligagull til Molde er god i år òg. Godset merkar presset ved å ligge på topp, og der er mange unge spelarar som byrjar og tenkje konsekvens av å tape.

– Så eg trur rett og slett hausten blir enormt spennande. Molde kan avgjere sjølv, i dei innbyrdes oppgjera mot Godset og RBK i løpet av hausten, seier Fostervold til NRK.no.

Men motstandarane er nærmare no enn i fjor, og dersom Molde skulle bli henvist til 2. eller 3. plass er ikkje Fostervold i tvil.

– For fotballen sin del så blir eg ekstremt glad om det då blir Godset. Det er imponerande og spennande det dei driv på med i Drammen.

Samanliknar Deila med Solskjær

For Strømsgodset imponerer den tidlegare Molde-kapteinen så til dei grader.

– Dei satsar på eigne spelarar og på å utvikle talent. Dei har mange spelarar frå området rundt Drammen, og ligg øvst i Tippeligaen med relativt små ressursar, seier Fostervold.

I tillegg står Godset-trenar Ronny Deila høgt i kurs.

– Han står fram som utruleg sympatisk, og eg har kjempetrua på at han kan bli ein stortrenar.

– Han er litt som Ole Gunnar ... ung og framadstormande, med klare idear om korleis det skal spelast fotball, meiner Fostervold.

– Dei har blitt attraktive for talent

Vegard Forren, som sjølv er trønder og har vore på Lerkendal mang ein gong som tilskodar, er einig med Fostervold.

– Strømsgodset har ikkje dei same midlane som for eksempel Rosenborg. Rosenborg har kjøpt inn godt med spelarar i sommar, medan Strømsgodset satsar på dei unge i laget.

– Og ved å gi unggutane tillit så har klubben blitt attraktiv for talent. Der er samanlikninga med han Ole Gunnar veldig sann, at Strømsgodset og Deila vil ha unge og viljesterke spelarar, seier Forren – som ein no kan kalle Molde-omvendt trønder.

Dagens serierunde er den tjuande. Etter måndagskampen mellom Fredrikstad og AaFK er det berre éin tredjedel igjen av sesongen.

– Hadde ein avslutta sesongen no kunne ein kanskje sagt at Strømsgodset hadde fortent gullet, men no skal det bli Molde, fortel Forren.

Men både den noverande Molde-midtstopparen og den tidlegare Molde-midtstopparen avsluttar med same frase:

– Dersom Molde ikkje tek gullet, så er Godset det beste alternativet.

Så står det igjen å sjå: Tek Strømsgodset sitt første seriegull sidan 1970? Forsvarer Molde fjorårets gull? Klatrar Rosenborg tilbake på trona? Eller kjem nokon frå plassane bak topp tre og overraskar?

Kva trur du?