Mona Iren Auganæs har stjerner i auga når ho omtalar det nye biblioteket, som er teikna av den nederlandske stjerna, bibliotekarkitekten, Aat Vos.
– Dette vert det første biblioteket på vestlandet som er teikna av Vos. Han står mellom anna bak BibloTøyen (ungdomsbiblioteket for 10–15 år) og nokre av filialane til Deichmanske.
På Bjørndals Minne, i dei gamle lokala som har vore nytta i 38 år, vert 20 000 einingar no pakka ned i kasser. Truleg vert det ein stad mellom 400 og 500 kasser før alt er i boks bokstaveleg talt.
Auganæs håper at det nye biblioteket vert ein møtestad i sentrum av Ulsteinvik.
Eitt av landets flottaste
– Dette vert eitt av landets flottaste bibliotek, seier ho. Samspelet i fleirbruksbygget vert også lagt vekt på. Her kan ein bruke mange timar på kveldane. Trening eller symjing og deretter tid i det nye biblioteket. Fleirbruksbygget inneheld klatrehall, badeanlegg og idrettshall i tillegg til biblioteket.
Til saman får ein 500 kvadratmeter å boltre seg på i det nye biblioteket og opningstidene vert utvida frå 25 til 72 timar. Ein del av dette er sjølvbetjening, seier biblioteksjefen.