– Det er heilt overveldande. Heilt utruleg å få ein slik pris, seier bilethoggaren Elena Engelsen, som står bak den kjende Tigerstatuen i hovudstaden. Ho fortel til NRK at ho blir rørt av at arbeidet hennar blir sett.
Målaren Håkon Gullvåg, ein av dei mestseljande norske kunstnarane har også vunne pris. Han og Engelsen er naboar på Ekely:
– Det er svært, denne prisen heng svært høgt og det er kanskje ekstra hyggjeleg å få han i ei unntakstid når verda står litt stille, forklarer Gullvåg.
Målaren blei heilt sett ut då leiaren i prisutvalet, Åse Kleveland ringde han for å gje den gledelege nyheita:
– Prisen er ein slags vaksine mot ei kjensle av å leve forgjeves. Då er ikkje alt forgjeves likevel. Det er ei stor oppmuntring til arbeidet.
Prisvinnarane: F.v. Lise Davidsen, Grete Pedersen, Elena Engelsen, Håkon Gullvåg, Mari Askvik og Ingvild Skaatan.
Foto: Linda Marie Vedeler / NRKDeler ut 2,6 millionar
På grunn av pandemien blei fjorårets utdeling av Anders Jahres Kulturpris avlyst. Difor blei det delt ut prisar for både 2020 og 2021 under utdelingsseremonien, onsdag.
Anders Jahres Kulturpris er ei æresbelønning for framifrå innsats innan norsk kulturliv.
Årets vinnarar er bilethoggaren Elena Engelsen og biletkunstnaren Håkon Gullvåg.
Vinnarane for 2020 er operasongaren Lise Davidsen, dirigenten Grete Pedersen og Det Norske Solistkor.
Prisen består av ein betydeleg pengesum, ein statuett av bilethoggaren og tidlegare prisvinnar Nils Aas samt eit handkalligrafert diplom. Prisen er den største i norsk kulturliv.
Operasongaren Lise Davidsen er utdanna ved Grieg akademiet i Bergen og Det Kongelige Danske Musikkonservatorium i København.
Foto: Linda Marie Vedeler / NRKLise Davidsen er ein av våre fremste operasongarar. No blir ho heidra med pris for sin framifrå innsats innan operakunsten.
– Det er heilt fantastisk. Ein stor ære rett og slett, seier Lise Davidsen om det å vinne Noreg sin største kulturpris.
Davidsen har tidlegare vunne ei rekke prisar: Frå Dronning Sonja sin Internasjonale Musikkonkurranse i 2015, til Sibeliusprisen i 2020. Seinast i år blei ho utpeikt som årets kvinnelege songar i 2021 i operahuset Bayerische Staatsoper i den tyske byen München.
Prisutvalet er leia av Åse Kleveland og består elles av Bentein Baardson, Svein Olav Hoff, Svein Aaser og Helene Uri.
Operasongaren frå Stokke ser tilbake på dei tidlegare vinnarane.
– Å få lov til å vere ein del av det selskapet, synest eg er ei stor ære altso.