Odd Einar ute av Stjernekamp: – Det var surt

Det var elektrisk stemning under kveldens Stjernekamp då artistane bydde på både hiphop og gruppeframføring i den energiske sjangeren eurodance.

Odd Einar Nordheim var ein av dei som imponerte ekspertane i kveld, men det var dessverre ikkje nok til å bli med vidare i musikk-konkurransen.

– Det var surt. Eit av dei største ønska mine var å synge med KORK, som skulle vere neste runde, seier han.

Trass i avskjed er han takksemd for erfaringane han har fått, og trekker spesielt fram norsk på norsk-sendinga førre veke.

– Eg fekk mykje glede og kjærleik frå publikum, det var utruleg sterkt, fortel han.

Han seier det viktigaste han kjem til å ta med seg vidare er dei vakre vennskapa han no har stifta.

Trass i at det vart meir fritid no enn han hadde håpa på, har han framleis ting som skjer framover.

– Eg skal gi ut plate i november, og då skal eg ut og spele litt. Og så ser eg fram til å gi dei heime ein god, etterlengta og lang klem, seier han.

Men fyrst gler han seg til å bytta frå cowboy-kostyme til vanlege klede, og ta ein øl saman med dei andre deltakarane.

Hiphop og eurodance

I kveldens Stjernekamp skulle artistane nok ein gong ut av komfortsona si då klassikaren hiphop stod for tur. Forrykande beats og slagkraftige tekstar var gjennomgangsmelodien i kveldens framføringar.

Men ikkje nok med det. Artistane måtte også gjennomføre kvar si gruppeoppgåve med eurodance som tema – ein sjanger som var svært populær på 90-talet.

Les kva NRKs meldar meiner om kveldens innsats: «Komikveld i Stjernekamp»

Det var artist, dansar og koreograf Maria Lotus Karlsen som var mentor denne veka. Ho var sjølv med i Stjernekamp i 2015.

Saman med Maria i ekspertpanelet sat også Jørgen Nordeng, tidlegare kjent under artistnamna Jørg-1 og Joddski og som frontfigur i hiphop-gruppa Tungtvann.

I gruppeoppgåva var det Thomas Borgvang og Camilla Alvestad som var gjesteekspertar. Dei er kjente frå eurodance-gruppa Reset, som toppa hitlistene frå slutten av 1990- og utover 2000-talet.

Dette var bidraga frå laurdagens episode av Stjernekamp:

1. Sandra Lyng: Run This Town – Jay-Z feat. Rihanna & Kanye West (2009)

Fyrste kvinne på scena var Sandra Lyng. Ho innrømte at ho synest hiphop er «fette» vanskeleg. Likevel var ekspertane svært begeistra av framføringa hennar.

– Det var fette bra, ropte Joddski.

2. Vegard Bjørsmo: GDFR – Flo Rida feat. Sage the Gemini & Lookas (2014)

Dei amerikanske rapparane Flo Rida og Sage the Gemini & Lookas har fått konkurranse frå 19-år gamle Vegard Bjørsmo, ifølgje ekspertpanelet.

– Du rappar det bra. Du får meg til å tru at bilar og damer er di greie. For ein fest, sa Mona B. Riise.

3. Odd Einar: All Good? – De La Soul feat. Chaka Khan (2000)

Odd Einar sikta høgt då han valde klassikaren All Good av hiphop og funk-legendene De La Soul og Chaka Kahn. Han innfridde til ein viss grad.

– Låten passar deg svært godt. Men eg humpa litt gjennom, sa ekspert Karlsen.

4. Emil Solli-Tangen: Freestyler – Bomfunk MC's (1999)

I forkant av kveldens sending avslørte Emil Solli-Tangen at det er lettare å kaste seg ut i fritt fall frå eit fly, enn å stå på scena å synge ein hiphop-låt. Men kva meinte ekspert Mona B. Riise om framføringa hans?

– Det var så gøy! Det var veldig bra, men ein kunne le samtidig, men eg elska det, sa ho.

5. Knut Marius Djupvik: Numb/Encore – Jay-Z feat. Linkin Park (2008)

Knut Marius Djupvik Valde å fusjonere hiphop og rock med sitt låtval i kveld. Han innrømte at han kjente seg litt naken i hiphop-sjangeren, men ekspertane meinte han var meir enn godt nok påkledd.

– Heilt nydeleg. Takk skal du ha! Du berre tok over scena, sa ei begeistra Karlsen.

6. Ingeborg Walther: Bad Blood – Taylor Swift feat. Kendrick Lamar (2015)

Sarpingen Ingeborgh Walther hadde aldri sunge hiphop framfor nokon før denne veka. Det stoppa ikkje ho frå å gi alt på riksdekkande TV.

– Vokalen din er heilt sjuk. Du serverte, sa ein entusiastisk Karlsen.

Aqua versus rednecks

1. Emil, Vegard og Odd Einar: Cotton Eye Joe – Rednex (1994)

Vi skal love å lage full låve-fest sa Vegard Bjørsmo om framføringa av den heftige Cotton Eye Joe.

2. Knut Marius, Ingeborg og Sandra: Barbie Girl – Aqua (1997)

Vi har køyrd på og gitt 100 % sidan vi fekk vete kva song vi fekk, sa Djupvik etter framføringa.