NRK inviterer denne våren til ein serie med åtte kontorkonsertar, i samarbeid med MIC Norsk Musikkinformasjon og NOPA. Mathias Eicks konsert i Nasjonalbiblioteket var den andre i rekka, og vart sendt direkte på P2 i Kulturhuset.
Sjå den første konserten:
– Gir eit ærleg bilete av musikken
Musikarane fekk langt mindre drahjelp frå teknikken enn under ein vanleg konsert, og trommisane Torstein Lofthus og Gard Nilssen måtte greie seg med ei spansk trekasse og ei gammal stortromme.
– Når ein må klare seg utan forsterkning, sit ein att med essensen av låtane, seier Mathias Eick.
– Det gir eit ærleg bilete av musikken å spele den akustisk, utan tilbehør. Eit slagord på ungdomsklubben eg spelte på som 14-15-åring var at «du er ikkje tøff viss du treng PA» (større lydanlegg, journ.anm.). Men gutta i bandet er gode til å spele, så dei treng ikkje slikt.
Ny plate rundt hjørnet
Mathias Eick er inne i ein svært hektisk periode som komponist og musikar; han står for musikken til dramaet Innsirkling ved Det Norske Teatret, han skal spele under ski-vm og skriv tingingsverk til Vossajazz i april. 4. mars kjem den nye plata Skala ut i Noreg.
Les:
Kontorkonserten i Nasjonalbiblioteket baud på eit aldri så lite pusterom for den travle trompetisten:
– Det var gøy, og veldig annleis enn det eg gjer elles, seier han.
– Eg tenkte mest på dei som stod i lokalet, og ikkje så mykje på alle som høyrde konserten på radio. Det var ei fin og intim setting å spele i, nesten som å vere på øving.
Den neste kontorkonserten finn stad 8. mars – på kontoret til kringkastingssjef Hans-Tore Bjerkaas.