Torsdag testa Johan Golden positivt på koronatest og må derfor stå over denne vekas «Nytt på Nytt»-sending.
Dette er fjerde gong «Nytt på Nytt» blir ramma av anten karantene eller korona.
– Det byrja vel truleg med ein pangolin i Wuhan ... for å gjere ei kjempelang historie kort. Eg vart vel smitta av Atle Antonsen for to veker sidan. Det høyrest lenge ut, men han er frå innlandet og dei smittar tregt, fortel Golden.
– Beste bursdagsgåva
Personen som tek over Johan Goldens rolle er ingen ringare enn komikar og programleiar Yousef Hadaoui.
Sist vi såg han på skjermen var da han leia «Idrettsgallaen» med Carina Olset i starten av januar. Han er òg kjend frå humorprogrammet «Svart humor».
Han har bursdag i dag, og skulle eigentleg ha fri. Men slik vart det ikkje.
– Dette er den beste bursdagsåva eg kunne ha fått. Det er stas og gøy å få oppdraget, seier Hadaoui, som har vore gjest på programmet tidlegare.
– Eg synest også det var på tide å bytte den eine brune med den andre brune dei har her på huset, legg han til med glimt i auget.
Då han vart spurd om å vere vikar heiv han seg rundt og var framme på Marienlyst 10 minutt etter førespurnaden.
Det er ny personleg rekord i «vikar på kort varsel», ifølgje Kjetil Kooyman som er prosjektleiar i «Nytt på Nytt».
Gjekk breitt ut på intranettet
– Vi gjekk ut breitt på intranettet og spurde om nokon var friske. Vi fekk svar frå ein i kantina, og svar frå Yousef, så då var valet enkelt, seier programleiar Bård Tufte Johansen.
Han synest det var veldig sporty av Yousef å stille opp på kort varsel.
– Vi gler oss for han er ein morosam, smart og blid fyr! understrekar Johansen.
Prosjektleiar Kooyman er einig.
– Vi gler oss over å få moglegheita til å leke med Yousef, som har stått på lista vår over «bra folk» sidan han var gjest hos oss, seier Kooyman.
Han er heller ikkje overraska at dei nok ein gong må hanke inn ein vikar, då vikarbehova følgjer deira kalkuleringar for vikarbehov.
– Vi reknar med at vi når ein vikarbehov-topp i løpet av dei nærmaste vekene og at vikarbehova deretter vil minke inn mot sommaren, avsluttar Kooyman.