Røynesdal kjem frå jobben som administrerande direktør for Oslo-Filharmonien der ho har vore leiar sidan 2013.
Ho er utdanna statsvitar og klassisk pianist, og har museumsbakgrunn som direktør for KODE sin komponistheim i Bergen i 2011–2013. Ho har styreerfaring frå blant anna Aschehoug forlag, Talent Noreg, VGTV og arbeidsgjevarforeininga Spekter.
– Ei ulempe
Ifølge kunstkritikar i Dagsavisen, Lars Elton, er valet av ny direktør overraskande.
– Ho står fram som ein dyktig administrator med klar internasjonal erfaring. Men det at ho manglar kunstfagleg kompetanse er heilt klart ei ulempe i ein så samansett organisasjon som Nasjonalmuseet, seier Elton til NRK.
Også ansvarleg redaktør for Kunstkritikk, Mariann Enge, synest valet er merkeleg.
– Det er viktig for ein leiar at ein har kjennskap og kompetanse innan det feltet ein skal jobbe med. Når ein ikkje har det, blir ein veldig avhengig av folk rundt seg, seier Enge.
Ingrid Røynesdal seier at ho har store ambisjonar for Nasjonalmuseet.
– Først ser eg fram til å bli kjent med museet sine mange dyktige medarbeidarar, slik at vi saman kan sette retning for åra som kjem. Deretter vil eg bidra til å vidareutvikle og forløyse det store potensialet som ligg i samlinga, formidlinga, publikumstilbodet, forskinga og den kommersielle drifta.
– Nokre etterlyser ein person med kurator-erfaring til jobben, kva tenker du om det?
– Det er forståeleg at det blir diskutert. Eg har ikkje kunsthistorie som bakgrunn, men eg har verkeleg jobba med kunstfaglege prosessar, og med kunst heile livet mitt, og eg trur eg har eit godt fundament for å leie dette vidare, seier Røynesdal til NRK.
– Fornuftig
Kunsthistorikar Tommy Sørbø synest valet av ny direktør høyrest godt og fornuftig ut.
– Kva meiner du om at ho manglar kurator-erfaring?
– Det hadde sikkert vore ein fordel. Men det blir sikkert vege opp av hennar entusiasme for kunsten. Og ho har med seg det musikalske. Ho ser ut til å ha eit personleg forhold til kunsten i aller vidaste forstand, seier Sørbø.
POSITIV: KODE-sjef Petter Snare meiner det er gjort eit godt val av ny direktør.
Foto: Dag Fosse / KODEDirektør for KODE Kunstmuseer og komponisthjem, Petter Snare, meiner det er eit veldig godt val.
– Ho har gjort ein fantastisk jobb både for KODE og Oslo-Filharmonien. Ho har særleg løfta filharmonien til fantastiske høgder, og vi ser fram til å samarbeide.
Snare er ikkje bekymra for at Røynesdal manglar kompetanse som kurator.
– Nasjonalmuseet er så fullt av folk med kurator-erfaring at det kjem til å gå heilt fint.
– Ein ny æra
Det er styreleiar Maria Moræus Hanssen som har leia arbeidet med å finne ny direktør til Nasjonalmuseet. Ho meiner den nye direktøren kan vise til sterke resultat i Oslo-Filharmonien, både i orkesteret si faglege utvikling og møtet med publikum.
– Røynesdal er samfunnsengasjert og svært ambisiøs på kunsten sine vegne, og potensialet den har til å nå bredt og bety mykje i folk sine liv.
LEIA PROSESSEN: Styreleiar i Nasjonalmuseet Maria Moræus Hanssen er ansvarleg for tilsetjinga av ny direktør.
Foto: Lise Åserud / NTBMoræus Hanssen meiner museets storleik, og museets oppgåver har vekst enormt. Og det inneber at ein må tenke litt nytt rundt leiarskap.
– Ingrid sin viktigaste jobb, og som ho også har demonstrert at ho har erfaring med å få til, er dette samspelet mellom alle dei sterke fagmiljøa på museet og løfte det fram. Vi kunne ønske all kunnskap i verda, men det er hennar ambisjonsnivå på vegne og kunst og kultur styret har late seg imponere av, seier Moræus Hanssen til NRK.
Røynesdal startar i jobben som direktør for Nasjonalmuseet 1. oktober 2023. Ho tek då over etter Karin Hindsbo.
