Er motenamnas tid forbi?

Nysgjerrig på eit spesielt årstal? Klikk her for å sjå allle toppnamna år for år!

Vinteren 2003 blei Rachel og Ross foreldre til vesle Emma i TV-serien Friends. Populariteten til namnet gjekk i taket her heime, og det året låg Emma på namnettoppen i 15 av landets 19 fylke.

20 år tidlegare herja Silje like vilt. Frå ho fyrst dukka opp som toppnamn i Troms og Hordaland i 1981 låg Silje på namnetoppen dei neste 17 åra.

Både Emma og Silje var ekte motenamn. Men Anne knuser dei begge.

Sjå i animasjonen vår korleis toppnamna sprer seg frå fylke til fylke over 55 år!

Anne og Jan, to monsterhitar

I bileta våre nedover i saka ser du korleis Anne dekkjer noregskartet det fyrste tiåret. Deretter blir ho liggjande som toppnamn i somme fylker til langt utpå 80-talet.

På gutesida var Jan nesten like dominerande. Jan låg i toppsjiktet frå 1934 til 1983. Anne låg på topp ti-lista frå 1930 til 1987. Det er over eit halvt århundre!

Lat oss samanlikne Annes popularitet med Emma og Silje. I toppåret 1958 blei 5,8 prosent av alle nyfødde jenter kalla Anne. Det er dobbelt så høg oppslutnad som Emma og Silje. I deira toppår fekk 2,7 prosent av alle nyfødde jenter desse namna.
På gutesida nådde Martin ein oppslutnad på over 3 prosent i 1993, men det slår ikkje Jan sine 4 prosent i 1957.

Me brukar fleire fornamn

– Me brukar fleire fornamn enn før, seier statistikar Jørgen Ouren ved Statistisk Sentralbyrå.

– Me får stadig fleire namn å velje mellom, og me er blitt flinkare til å variere. Namna ligg ikkje like lenge på namnetoppen som før, namna når toppen raskare, og nedturen er krappare enn før.

Ouren fortel at namnetrendane oppfører seg som andre trendar i tida vår. Dei skiftar raskare enn tidlegare, og når noko fyrst blir utrendy skjer det veldig fort.

Og som med andre motar blir òg namn trendy att. Det går mellom 100 og 120 år frå eit namn er på topp til det blir trendy på nytt.

– Agnes, Signe, Ludvig og Sigurd er døme på namn som no er på full fart framover. Dei var sist populære for rundt 100 år sidan, og har klatra jamt og trutt dei siste tiåra.

Sjå meir om namnemotar i Nomino på NRK1 i kveld.