Blodslit i joggedress

Med joggedressen på og raudvin som styrkedrikk er Linda Eide klar for sitt livs løpetur.

Målet er å springe så langt ho klarer på eit døgn.

• Se hele den siste episoden av Norsk Attraksjon her

Storhendinga skjer 14.august 2008. Eide står på startstreken i Fresvik i Sogn, bak henne ruvar minnesteinen til mannen som har utløyst galskapen.

- Kunne Mensen Ernst springe frå Paris til Moskva på fjorten dagar, må kven som helst med en normal vestnorsk grunnform klare ein tur over Vikafjellet, seier ho kjekt.

Mannen med det merkelege namnet vart fødd i Fresvik i 1795.

Han heitte eigentleg Mons Monsen Øyri og var ein av dei største idrettsutøvarane Noreg har fostra.

Øyri reiste ut i verda som sjømann og oppdaga snart at han hadde eit stort løpetalent. Han skifta namn og vart berømt for si utrulege uthaldsevne.

Ein av dei største prestasjonane hans var eit løp mellom Paris og Moskva i 1832. Den distansen gjorde han unna på berre to veker, og la dermed bak seg 180 kilometer i døgeret!

Norsk Attraksjon vil hylle løpekongen og Linda Eide er i siget.

Ho skal springe over Vikafjellet, ned til Voss og, om alt går som planlagt, krysse målstreken på Fisketorget i Bergen eit døgn seinare.

Drøy diett

To mil i strekk er det lengste programleiaren har sprunge før. For å klare dette kjempeløpet held ho seg til same diett som Mensen Ernst brukte, store mengder raudvin og gulerøter.

Dessutan tek ho i mot det som jublande tilhengarskarer gjev henne undervegs.

- Eg fekk spaghetti med kjøtsaus frå italienske bubilturistar, samt lefse, bringebærsaft, kvitvin og bananar i lange baner, fortel Eide.

Turen frå Fresvik til Bergen er ikkje berre lang, den er også svært kuppert, med ei stigning på oppimot 1000 meter over Vikafjellet.

- Etter å ha løpt så lenge, fekk eg nyvunnen respekt for dei som har løpt enda fleire mil, seier programleiaren.

Ho er sveitt no. Vegen er bratt, det er langt igjen og regnet ausar ned. Likevel held ho koken. Ikkje før ho har kryssa fjellet og nådd Vinje, i Voss kommune, møter ho veggen.

Ho sig saman på ein benk og freistar å få nye krefter med ein skvett pappvin.

Kroppen takkar nei. Fyrst etter ein kopp kaffi og ei skive med geitost er ho klar til å halde fram.

• SJÅ SAKA I NETT-TV: Mensen Ernst

Tre maraton på eit døgn

Synet av heimbygda gjev sårt tiltrengt motivasjon. Langs vegkanten viftar sambygdingar henne fram med flagg og jublande tilrop. Føtene er fulle av blemmer, men spring taktfast vidare.

Oppmuntring frå heimepublikummet gjer turen gjennom Voss til ei triumfferd, men døgnet er snart over og det er enno mange mil til Bergen.

Når klokka slår tolv er løpedronninga på Bulken. Mange mil frå Fisketorget, men milevis bra nok til å vere ein fullgod hyllest av Mensen Ernst.

På eit døgn har Linda Eide sprunge 116,7 kilometer. Det er nesten tre maraton.

- No veit eg litt om korleis Ernst hadde det, slår ho fast.

• Finn fleire: Attraksjonar på kartet