– Musikken vil overskugge skandalane

Per Sundnes tok imot meldinga om dødsfallet til Whitney Houston i natt. Han var ikkje ein av dei som blei sjokkert over nyheita.

– Det er tragisk, men det låg litt i korta. Den verste kombinasjonen i verda er kjendisar og misbruk. Så dette kom nok ikkje som ei bombe, seier Sundnes til NRK.no.

• BAKGRUNN: Sanglegenden Whitney Houston er død

Sundnes trur at eks-mannen Bobby Brown har mykje av skulda for at det gjekk så dårleg med Whitney.

– Ho starta artistkarrieren som ei prektig jente som korkje drakk eller røykte, og når ho møtte Bobby Brown snudde alt.

– Dette er berre ein tragedie. Eg tenkjer spesielt på dottera, 19 år gamle Bobbi Kristina, seier Sundnes.

Sundnes meiner at Whitney har hatt stor innverknad både på MGP og i songkonkurransar som Idol.

– Ho har forma ein ny songkultur saman med Mariah Carey. Låtane hennar er blitt showcase-nummer, som gjerne er vanleg i slike konkurransar. Hennar type balladar gjorde det spesielt bra i Eurovision Song Contest i fjor.

Fekk sjokk

Tidlegare Lydverket-programleiar, Mona B. Riise, tok i mot beskjeden som eit sjokk.

– Eg sto på kjøkkenet då nyheita kom på radioen i går, og eg kunne ikkje tru kva eg høyrte. Dette er forferdeleg trist. Whitney Houston var ein av dei aller største popsongarane, og min store favoritt, fortel Riise til NRK.no.

– Ho er ein del av ungdommen min, men eg elskar framleis hennar fantastiske stemme, og speler framleis mykje Whitney heime.

– Korleis trur du ettermælet hennar vil bli?

– Stemma og musikken til Whitney vil bli ståande. Hennar hjarteskjerande historie vil sjølvsagt også bli hugsa, men musikken vil heldigvis overskugge skandalane.

• SJÅ VIDEO: Fansen sørger over Whitney Houston

Hadde håp om comeback

Riise trudde at comebacket i 2009 ville bli ein ny og positiv vending for superstjerna. Men slik gjekk det ikkje.

– Då Whitney kom tilbake i 2009 var både eg og alle andre så håpefulle for ho. Eg ønskte at bileta i sladrepressen skulle ta slutt, og at ho skulle ha eit skikkeleg comeback. Men ho sa det likevel sjølv i 2009 – «eg tek ein dag om gongen».

– Me veit ikkje årsaka til dødsfallet enno, men ho hadde diverre oddsa mot seg.

Trur ein vil gløyme det kjipe

Asbjørn Slettemark i Lydverket fortel at han dei siste åra har følgt karriera til Whitney med undring, og at det ikkje kom som noko overrasking at ho no er død.

– Dette var på ingen måte overraskande, men det er alltid trist når folk dør i ung alder. Ho var jo i ein periode ein av verdas største popartistar.

– Men den siste åra har eg meir følgt karrieren hennar med undring. Det er diverre lenge sidan hennar stordomstid.

Slettemark trur Michael Jackson sitt dødsfall viser at musikken vil overskugge alle skandalar, uansett kor store dei er.

– Litt som med Michael Jackson vil ein etter kvart gløyme dei kjipe tinga. Når Michael klarte det, så er det openbart at det same kjem til å skje med Whitney.

Etterlet seg eit tomrom

Musikksjef i P3, Mats Borch Bugge, meiner Whitney Houston var unik i popverda, og at ho no etterlet seg eit stort tomrom.

– Ho var jo ein av dei siste divaene i popverda. Me har kvinnelege artistar som Rihanna i dag, men dei har ikkje samme utstråling som Whitney. Difor etterlet ho seg eit tomrom. Spesielt blant afroamerikanarar.

Bugge trur at artisten Alicia Keys kan vere den som vil ta over dette tomrommet.

Trass i det harde livet hennar, trur også Bugge at musikken vil overskugge skandalane.

– Eg trur heilt klart at det er musikken som vil stå igjen. At stemma vil leve lenge er nettopp det som kjenneteiknar store soul-syngjarar.

Kva hugser du best frå karrieren til Whitney Houston? Sei di meining under.