Denne veka starta arbeidet med å bygge ein ny flyplass i Sälen, som ligg berre 40 minutts køyring frå Trysil.
Målet med den nye flyplassen er å frakte skituristar til Noreg og Sverige. Det meiner leiaren i Naturvernforbundet i Hedmark Thomas Cottis er håplaust.
– Det er eit utruleg sjølvbedrag. Det er ingen måte du forureinar klima meir og raskare på enn ved å fly. Det å frakte flyturistar for å stå på ski, det er som å tenne på huset for å halde varmen, seier Cottis til NRK.
– Snøen vil forsvinne
Cottis meiner det er paradoksalt at dei satsar på meir skiturisme når dei på same tid bygger ut for meir flytrafikk som vil føre til større utslepp.
– Snøen blir raskare borte, jo meir klimagassar vi slepper ut. At ein bygger ein flyplass for å gå på ski, er så sjølvmotseiande som det kan bli, seier Cottis.
Han meiner det vil øydelegge ressursen som turistane vil reise til.
– Jo meir vi flyr, jo meir øydelegg vi snøen vår.
Stor optimisme i regionen
Under det første spadetaket tidlegare denne veka, var det stor optimisme blant aktørane.
– Eg gler meg til å sjå korleis det ser ut her om ti år. Heile regionen blir ein vinnar. Trysil er berre 44 kilometer unna flyplassen, og Hundfjället i Sälen er berre sju kilometer unna. Det finns ingen i Europa som kan konkurrere på tilgjengelegheit, sa direktør i Skistar i Trysil, Bo Halvardsson.
Den svenske næringsministeren Mikael Damberg meiner òg det vil skape fordelar på begge sider av grensa.
– Eg trur flyplassen vil føre til vekst i næringslivet og fleire arbeidsplassar både i Noreg og i Sverige, så begge landa er vinnarar her, sa næringsministeren.