Feirar jul på hytta: – Eg vart juleglad langt inn i hjarterota då eg kom opp her

– Det var fantastisk å komme hit. Det kjennest ut som at det har regna i tre månader i Oslo.

Det fortel Wenja Schmidt Eriksen. Ho og familien er frå Oslo, men jula blir feira på hytta i Hafjell kvart år.

Og i år blir dei etter alt å dømma langt frå åleine. Difor tek kommunane ekstra atterhald før storinnrykket.

For få dagar sidan vart denne tekstmeldinga sendt ut til alle som oppheldt seg i Øyer kommune, der det kjente hytteområde rundt alpinanlegget Hafjell ligg:

• Les også: Hyttekommunen Hol strammar inn – avgrensar talet på tillatne julegjester

Storinnrykk

Vanlegvis gjer NHO Reiseliv ei undersøking blant nordmenn om planane deira for julefeiringa, men på grunn av situasjonen i år valde dei å la vera.

Men Ove Gjesdal i Visit Lillehammer har sjølv rekna på tala, og han trur det er svært mange som vil feire jula på hyttene sine i år.

– Det er nok sannsynleg at det kjem om lag 200 000 til Innlandet, seier Ove Gjesdal.

Talet kom han fram til ved å rekne at det er om lag fire personar per hytte og at om lag halvparten av dei kjem til å bli brukt.

Innlandet er det største hyttefylket i landet med om lag 85 000 fritidsbustader.

• Les også: Slik vil fjellbygdene unngå nytt hytteforbod

Begynte med munnbind

Stein Plukkerud er hytteutviklar og innbyggar i Øyer kommune. No har mange allereie innteke hyttene sine på Hafjell.

Meldinga ordføraren sende ut til alle som oppheldt seg i kommunen, med råd om å bruka munnbind, blir følgt av dei fleste, meiner Plukkerud.

– Eg var i butikken sjølv for to dagar sidan utan munnbind og vart flau. Alle som var på butikken hadde det. I går, då eg skulle på Coop i Hafjell på nytt, hadde eg munnbind på meg eg òg, seier han.

Plukkerud snakkar mykje med hytteeigarane i Hafjell og seier det er viktig for dei å kunne vere på hytta si no. Hytteutviklaren seier det berre er bra at folk kjem seg ut av Oslo.

– Vi fordeler jo folka på 600 kilometer med skiløyper i eit fjell som er 264 000 mål stort. Det er vanskeleg å sjå for seg at det skal vere stimulerande til smittespreiing, seier han.

• Les også: Fleire hotell riggar seg for storinnrykk i jula

Ekstra opptekne av smittevern

Familien Schmidt Eriksen seier dei alltid følgjer smittevernreglane slavisk.

– For oss som er frå Oslo ligg dette litt i kvardagen vår. Det er utenkeleg å gå i butikken utan munnbind og utan å halde avstand, seier Wenja Schmidt Eriksen.

Ho fortel at då dei kom til Innlandet følte dei at dei var meir forsiktig enn innbyggarane sjølv. Det endra seg då det vart fleire smitteutbrot i regionen.

– No er folk mykje meir opptekne av avstand og reglar. Men det er mykje folk i fjellet. Det merkar vi, seier Morten Eriksen.

– Sjekk reglane i hyttekommunen

Kommuneoverlege i Lillehammer, Morten Bergkåsa seier dei i helsevesenet no er førebudd på storinnrykket av folk.

– Vi veit det er høg risiko for lokale utbrot. Men vi har gode system for testing og smittesporing, seier han.

Likevel oppmodar han igjen folk til å tenke seg om, følge reglane og ha minst mogleg sosial kontakt.

– Det er viktig at hyttefolket set seg inn i reglane som gjeld i kommunen dei skal til, seier kommuneoverlegen.