Mildvêr i Sør-Noreg: Politiet rår folk til å la bilen stå

– Vi oppfordrar alle som ikkje må ut og køyre, om å la bilen stå når det er så vanskelege køyreforhold som vi ventar utover. Viss du må ut og køyre, ber vi bilistar ta det forsiktig og køyre etter forholda, seier operasjonsleiar Tor Grøttum i Oslo-politiet.

Vegtrafikksentralen Øst seier til NRK at mange småvegar er glatte, spesielt der det er snødekke.

– Me må rekna med at det er glatte vegar til regnet gjer seg, seier dei laurdag kveld.

Vegtrafikksentralen Sør fortel NRK at det er utfordrande når endringar i veret kjem så fort som no, og at nokre stader frys det til is også over der entreprenørane nyleg har strødd.

Folk som ikkje kjem fram på mindre vegar må rekna med å venta ei god stund på at det blir strødd eller brøyta, fordi det er travelt seint laurdag kveld.

Sør-Øst politidistrikt melder at ein bil har sklidd av vegbanen og har kjørt i autovernet ved Drammensbrua på E18, like før midnatt. Det er førebels ikkje klart om det har skjedd på grunn av føret.

– Mange telefonar

Oslo-politiet får laurdag kveld mange telefonar om glatte vegar og vanskelege køyreforhold grunna regnet som har kome i Asker, Bærum og Oslo kommune.

– Der det er så glatt at det er fare for liv og helse og der det kan oppstå trafikkfarlege situasjonar, kan politiet kontaktast slik at vi kan varsle vegmyndigheitene, seier Grøttum.

Han understrekar at folk ikkje treng å ringe berre for å fortelje at det er glatt på vegane.

– Vi veit at det er glatt i heile distriktet.

Også Vegtrafikksentralen Øst er einige i at det kan vere lurt å la bilen stå. Dei opplyser om glatte vegar rundt Oslofjorden og vidare nordover mot Mjøsa.

– På dei store hovudvegane skal det vere bra køyreforhold, men frå Gardermoen og vidare nordover mot Mjøsa er det også glatt på E6. Det kan vere vanskeleg å sjå at det er glatt, seier dei.

Entreprenørar er sende ut for å salta og strø der det trengst.

Vegtrafikksentralen Sør rår også til at bilen får stå, men det skal vere fine køyreforhold på E18 gjennom Vestfold og Telemark og Buskerud.

Kansellerte bussruter

Fleire bussruter i Tønsberg, Færder, Horten og Sandefjord er kansellerte på deler av ruta på grunn av det glatte føret.

Laurdag kveld er fleire ruter råka, ifølge Vestfold kollektivtransport sine heimesider.

– Dette er augneblinksbilete som kan endrast fort. Det er ikkje så mykje å gjere, seier seksjonsleiar Trond Myhre i Vestfold kollektivtransport.

– Tryggleiken må kome først. Er det ikkje forsvarleg å køyre så kan vi ikkje køyre, seier han.

Kan bli overfløymingar

Meteorologane har sendt ut farevarsel for is delar av Austlandet. Etter fleire dagar med store snømengder i Sør-Noreg er det no mildare og nedbør kan komme som regn.

– Det vil føre til nedsmelting av snø langs vegnettet, og det kan føre til lokale overfløymingar, sa trafikkoperatør Arvid Wahlstrøm i Vegtrafikksentralen Øst tidleg laurdag.

Med regn og snøsmelting kan det fylle seg opp i avløp, ifølge Wahlstrøm.

– Gjerne der det ligg sluk og slikt som går tette og anten må tinast eller reinskast opp.

Han sa det var fare for dette utover ettermiddagen og kvelden laurdag og på søndag.

– Det kan bli glatt, så vi har gått ut gjentatte gonger til trafikantane og sagt at det må dei vere obs på, og justere hastigheit etter det.

Er i beredskap fleire plassar i landet

I Vestfold og Telemark melde fylkeskommunen om at det kunne bli underkjølt regn og krevjande forhold på vegane. Dei har full beredskap gjennom heile helga og alle mannskap ute.

– Vi prioriterer no å få opna vassvegane for å få mest mogleg av vatnet unna. Dette vil vi måtte prioritere over å få rydda alle gong- og sykkelvegar, seier Trond Haugstad som er leiar for drift og vedlikehald i Vestfold og Telemark.

Asbjørn Stensrud, som er leiar for seksjon drift i Statens vegvesen i Innlandet seier dei og er rusta etter vêrmeldinga. Dei er klare for å kunne ta ut grøfter om det blir mykje vatn.

– Det er til dels høge snøkantar og det skapar utfordringar om det blir mykje vatn. Difor er vi i beredskap med gravemaskiner og veghøvlar for å ta unna.

Reidar Dåstøl er byggherrevakt på fylkesvegnettet i Agder. Han seier at også dei har full beredskap ute på vegen i samband med vêret som er meldt.

– Det er jo meldt regn opp i 1000 meters høgd, så det er full beredskap for alle entreprenørar. Dei er ute og grev vekk slik at sluker er opne. Det er snø i innlandet og regn ved kysten, seier Dåstøl.

Dei kjem til å følge ekstra med vegane innover i Agder. Ved kysten er det bart, medan der er 60–70 centimeter snø innover i fylket.

Tidlegare var det møte mellom meteorologar, politi, Statens vegvesen, Nye vegar og fylket, for å sjå på vêrsituasjonen som kjem.

Vegtrafikksentralen Sør som overvakar vegnettet i Agder, Vestfold og Telemark og Viken Sør venta utfordringar i trafikken tidleg laurdag.

Vegtrafikksentralen midt melder at det klokka halv ni om kvelden er utfordrande føre i området Kyrksæterøra og E39 fra Vinjeøra mot Orkanger, grunna glatte vegar.

– Entreprenør er varsla og er ute og gjer tiltak. Senk farten og køyr forsiktig, skriv Vegrafikksentralen midt på Twitter.

Samstundes åtvarer meteorologane om kraftige vindkast i Nord-Norge.

Bør berekne god tid

Anniken Island i Vegtrafikksentralen Sør bad laurdag folk tilpasse farten til forholda og halde god avstand til andre trafikantar, både fotgjengarar, syklistar.

– Du bør berekne god tid og følgje med på trafikkmeldingar som blir lagt ut, seier Anniken Island.

Politiet i Innlandet melde om at det hadde gått fint for seg i trafikken i morgontimane. Men dei følgde også nøye med på vêret som var meldt.

– Vi oppmodar om å køyre etter forholda og berekne god tid. Ta omsyn til kvarandre, seier Andreas Ulshagen Jorde hos politiet i Innlandet.

Opent på dei fleste fjellovergangane

Dei aller fleste fjellovergangane i Sør-Noreg er førebels opne.

Fylkesveg 53 Tyin-Årdal er stengt grunna uvêr.

Fylkesveg 27 over Venabygdsfjellet held stengt til søndag morgon og då blir det gjort ny vurdering.

På Vikafjellet har det vore stengt, men det blei kolonnekøyring frå klokka 12 laurdag.

Hol-Aurland har vore stengt, men opna igjen laurdag føremiddag.