Klaga på utebod – nå blir det blokk i staden

– Blokka kjem seks eller åtte meter frå terrassen min. Høgda blir omtrent frå toppen av den bjørka og bort til toppen av lyktestolpen. Fem meter høgare enn mønet mitt.

Erik Sakslo peikar bortover den bratte bakken der kveldssola i dag kan smyga seg inn i hagen hans.

– Me blir fullstendig innebygd.

Det var nettsida tunnelsyn.no som først omtala saka.

I skuggen av utviklinga

Han bur eit kvarters køyring vest for Bergen, i Geitevikja på øya Litlesotra. Området rundt kommunesenteret Straume skal bli Sotra Kystby – eit etter planen nytt, pulserande og urbant sentrum. Som del av den ekspanderande bygdebyen blir ei rekke landlege bustadområde endra.

Einebustaden til Erik Sakslo er i ferd med å hamna i skuggen av utviklinga. Det han trudde skulle bli ein skjemmande utebod på nabotomta, er omdefinert til ei tre-etasjars bustadblokk tett på huset hans.

– Dei hadde teikna ein liten firkant og ein prikk. Me antok det var ein bod, og klaga på at den var for nær og for høg. Årevis etterpå fekk me teikningar som viste at «boden» var blitt ein del av blokka.

Klaga på bod

Sakslo klaga på reguleringsplanen for ei lågblokk og reagerte særleg på at det skulle byggjast ein høg utebod for leilegheitene som ville stengja for kveldssola. Då Fjell kommune og Fylkesmannen i Hordaland avviste klaga, kalle dei det også ein bod.

• Les også: Bygger opp ein heilt ny by frå grunnen av

Sakslo klage igjen, og først tidlegare i år fekk han sjå teikningar som viste at utbyggjaren planlegg ei samanhengande bustadblokk, og ikkje ein bod.

– Både eg og kommunen har misforstått. Byggherren har nok gjort dette taktisk. Det er sleipt å søka på den måten.

«Det er ikke lagt opp til noen utvendig bod», skreiv bergensfirmaet OG Arkitekter i april i år. Arkitektane skreiv at dei først hadde teikna ein felles bod for dei elleve einingane, men at det var ein illustrasjon som ikkje er juridisk bindande.

NRK har vore i kontakt med selskapet, som meiner dei har følgt alt av lovar og reglar. Det får dei støtte i hos Fjell kommune.

Kommunen: Gjort etter planen

Plan- og utbyggingssjef Berit Karin Rystad i Fjell kommune avviser at byggherren eller kommunen har gjort noko gale, og seier at det ikkje er lureri.

– Utbyggjaren kan sjonglera med korleis dei vil forma ut boden og bustaden. Det er gjort etter boka.

Ho fortel at det har vore ein god del klager i samband med fortettingane og urbaniseringa.

– Men viss me gir dispensasjonar og ikkje held oss til planen for Sotra kystby, misser me handlekraft og investorar.

– Så det er viktig å ikkje ta omsyn til innvendingar frå naboar?

– Svært viktig, særleg på slutten av planprosessen. Når ein skal byggja ein by, må ein knusa nokre egg.

I ein tidlegare versjon av saka stod det at klaga no blir behandla av Fylkesmannen i Hordaland. Det er ikkje riktig. Etter klaga frå Sakslo skal Fjell kommune på synfaring.