Gjerdet stogga raset som kunne fått store konsekvensar på E16

– Det er ein god del kubikkk som har gått i fanggjerdet her.

Geolog Harald Hauso peikar opp i den bratte fjellskrenten over E16 på Langhelle mellom Bergen og Voss.

Raset han viser fram ville gått rett ned i hovudvegen mellom Bergen og Oslo. Men akkurat her har det store fjellpartiet nyleg blitt sikra med både sikringsnett og fanggjerde.

Dermed trefte geologane blink med plasseringa. Kring tre kubikk med jord, trestubbar og stein ligg klistra i fanggjerdet.

– Det er godt å sjå at ingen har fått det på seg og at vi har treft godt med plasseringa, kommenterer Hauso.

Ras som aldri trefte vegen

Observante forbikøyrande har kanskje sett raset i fjellsida rett over det som nyleg vart kåra til «Noregs verste veg».

I 2015 og 2016 hengte Vegvesenet opp 900 meter med nye fanggjerde på den rasutsette europavegen (sjå før og etter bildet over).

Det har gitt resultat. Hauso trur det har gått tosifra mengd ras og skred i fanggjerda på E16 siste ti åra. På heile Vestlandet er det truleg snakk om godt over hundre.

– I fjor måtte ei stor steinblokk flygast vekk med helikopter frå eit fanggjerde ved Hettetunnelen. I år har det vore fleire treff i fanggjerda, men mykje av det er mindre stein, seier Hauso.

Han vil syna fram det ferske raset ved Langhelle som bevis for at fanggjerda til 20.000 kroner meteren fungerer slik dei skal. No vil han henga opp fleire så fort som råd.

– Vi kan raskt få opp ein kilometer til med fanggjerder. Vegvesenet har ei liste med fleire skredpunkt der det er behov for sikring.

Pengar først i 2021

I 2015 omdisponerte Vegvesenet midlar og gjorde rassikring på seks raspunkt (ekstern lenke).

Men geologen må smørja seg med tolmod før han kan halde fram med rassikringa på E16.

I handlingsprogrammet til Statens vegvesen ligg det inne midlar til sikring først i 2021 og 2022.

Totalt er det sett av 51 millionar kroner. Samstundes er planen å byggja heilt ny E16 og togbane mellom Bergen og Voss, med første byggetrinn ferdig tidlegast 2029.

Begge deler er lenge å venta på for ein uroa geolog.

– Vi kan ikkje vente til det prosjektet står ferdig. Det kan ikkje bli noko kvilepute. Vi treng mellombels sikring og då er fanggjerda gode, avsluttar Hauso.

Raset i fanggjerdet ved Langhelle blir truleg rydda vekk denne veka. Då kan det bli periodar med dirigering i eitt felt forbi staden.

• Les også: Børge og konen havnet midt i raset på E16: – Vi måtte kjøre slalåm for å unngå steinene
• Les også: – Vi må vera førebudde på ein katastrofe