Fleire nordmenn vil kjempe mot ebola

Turid Andreassen er sjukepleiar og har akkurat kome heim til Bergen frå Sierra Leone. I fem veker har ho jobba på eit Røde Kors-sjukehus med pasientar som er ramma av ebola. Ho har med seg sterke inntrykk heim.

– Du ser at familiar forsvinn, og små landsbyar blir halverte, seier Andreassen.

Minst 5000 menneske i Vest-Afrika er smitta av ebolaviruset, som har ein dødsrate på mellom 40 og 90 prosent. No er Noreg er eit av dei landa som trappar opp innsatsen mot ebola.

• LES OGSÅ: Norge aukar innsatsen mot ebola
• LES OGSÅ: Overvann ebolaviruset – vil ut i felt igjen
• LES OGSÅ: Ber fleire norske helsearbeidarar melde seg
• LES OGSÅ: Talet på døde søkk: – Me ser at hjelpa verkar

Folk ynskjer å bidra

Talet på norske helsearbeidarar som vil bidra i kampen mot ebola mangedobla seg dei siste vekene, og rundt 400 legar og sjukepleiarar har meldt seg for å reise til Vest-Afrika.

Dei neste ni månadane skal 200 norske helsearbeidarar sendast til Sierra Leone for å ta imot ebola-pasientar på eit norsk-britisk sjukehus.

Ola Jøsendal i Helse Bergen har fått i oppdrag å koordinere Norge sin innsats mot ebola, og han gler seg over alle som har meldt seg til teneste.

– Eg trur det er stor merksemd på at det er ein veldig tilstand i Sierra Leone, og at folk har eit engasjement og eit ynskje om å kunne bidra, seier Jøsendal.

Helseminister Bent Høie er klar på at dei som reiser til ebolaramma område samtidig utsett seg sjølv for ein stor risiko.

– Det seier mykje om den idealismen som norsk helsepersonell har, seier helseminister Bent Høie.

Sterke inntrykk

Etter opphaldet i Sierra Leone skal sjukepleiar Turid Andreassen no tilbake i sin vanlege jobb på barneklinikken på Haukeland sjukehus.

Ho seier dei som no skal reise ut for å hjelpe ebola-pasientar må vera førebudd på sterke inntrykk.

– Du ser barn heilt aleine, som døyr heilt aleine, eller så blir dei friske og skal reise heim, men så har dei ingen å reise heim til, seier Turid Andreassen.

– Me hadde gravplass ved sida av sjukehuset, slik at dei som døde kunne bli gravlagt der, seier Andreassen.