Det bygger opp til ein heftig bompengedebatt på landsmøtet i SV i helga.
Rogaland SV føreslår å gå inn for å slutte å bruke bompengar til å finansiere vegprosjekt.
Forslaget har møtt motbør frå partileiinga.
Og fylkesleiinga i Vestland SV føreslår no saman med Bergen SV at det skal vere dyrare å køyre gjennom bomringane i byane enn det kostar å velje kollektivt.
– Vi meiner det er eit viktig prinsipp at bompengesatsen skal vere høgare enn prisen på bussen. Dette vil vere bra politikk i alle storbyane.
Det seier Jarle Brattespe, tredjekandidat for Bergen SV.
– Vi er ueinige i strategien til Rogaland SV. Ein må kunne nytte bompengar lokalt for å løyse trafikkutfordringar, så lenge det bidrar til ei omstilling frå bil til kollektivt, seier førstekandidat Marthe Hammer i Vestland SV.
SV-politikarane vil finansiere billigare kollektivprisar ved å behalde rushtidsavgifta og samstundes auke bompengesatsane elles i døgeret.
I Bergen kostar det i bomringen 30 kroner med dieselbil utanfor rushtida, og 24 kroner med rabattavtale. Til samanlikning kostar ein billett på buss og bybane 38 kroner.
I rushtida er prisen med dieselbil 56 kroner, eller 44,8 kroner med rabattavtale.
Bompengar sikra Bybanen
Rogaland SV er ikkje framand for å bruka rushtidsavgift til finansiering av kollektivbillettar, men meiner at å nytte bompengar til å finansiere vegprosjekt bidrar til meir utbygging og auka trafikk.
– Målet er å redusere vegbygging, som vil betre klimaet, redusere nedbygging av matjord og styrke grunnlaget for kollektivtilbodet, seier gruppeleiar i Rogaland SV, Heidi Bjerga.
Marte Hammer seier bompengefinansiering av kollektivtilbod har vore gull verdt i Bergen.
– Vi hadde ikkje hatt ein bybane om vi ikkje hadde hatt bompengar. Den er i stor grad finansiert av bomringen, seier ho.
«Adjø, solidaritet»
– Det første eg tenkjer på når eg høyrer dette, er Wam og Vennerød-filmen frå 1980-talet som heiter «Adjø, solidaritet», seier Trym Aafløy frå «Folkeaksjonen nei til meir bompengar».
Han meiner Vestland SV og Bergen SV ikkje lenger har solidaritet med innbyggjarane.
– Dei er berre ute etter å bruke bilistane som ei mjølkeku for politiske kjepphestar. Forslaget til SV er skammeleg.
Aafløy hevdar at også han ønsker lågare kollektivprisar, men seier det ikkje skal råke bilistane.
– Det er staten si oppgåve å skaffe låge kollektivprisar. Det er dei som skal oppfylle Paris-avtalen. Bilistane er allereie med på å betale gjennom den vanlege skatten. At det skal vere ein eigen bilskatt i tillegg, er absurd, seier han.