– Me har hatt stor pågang no. Folk ringer for å bestille time, men me har ikkje noko ledig, seier hundefrisør Anita Szabo.
På Bisken hundefrisør i Solbergelva er det no to månader lang ventetid for å få ein time.
Skal du klippe hunden for å gjere sommardagane svalare for han må du sjekke kva pels han har.
Kort og stri pels beskyttar
For nokre hundar kan ein hårklipp gjere dagar i varmen betre. Bruer jobbar hjå Bisken hundefrisør i Solbergelva saman med hundefrisør Anita Szabo.
– Dei med tolagspels, som golden retriever og samojed, skal ikkje klippast. Overpelsen deira kan bli øydelagt av klippen. Dei skal ha ein vask og bli føna for å få ut gammal underull, seier Szabo.
For desse hundane beskyttar overpelsen mot varmen.
Lite eller ingen pels – bruk solkrem
– Ryggen er alltid i sola, so den er det viktig å smørje inn. Ansiktet er og utsett for å bli solbrend. Stader på kroppen deira med tynn hud er viktig å smørje med solkrem, seier hundefrisør Mathilde Bruer.
Ho eig ein nakenhund som heiter Jazz. Han treng eit lag med solkrem før han går ut i sola.
– Nakenhundar og hundar med veldig kort og tynn pels som har rosa hud er det fint å smørje inn med solkrem. Du kan òg kle på dei ein tynn pysj for å hindre at dei blir solbrende.
Blir raude i huda
Du ser dei same symptoma på solbrend hud hjå hundar som menneske. Huda deira blir raud og sår.
– Når hundar blir solbrende ser du at dei sleikjer seg på det området. Om hunden din er solbrend kan du kle han i ein pysj eller bruke ei plastkrage som du får hjå dyrlegen. Då får han ikkje sleikje på såret og det blir fortare betre, seier Bruer.
– Du kan òg smørje inn det solbrende området med aloe vera.
Bruk ein nøytral solkrem
For å beskytte hunden må du bruke solkrem med solfaktor 30 eller høgare. Hundehelse.no skriv at ein nøytral solkrem, utan stoff som sink, er det beste for hunden då dei kan sleikje i seg solkremen.
– Det er lurt å gi hunden ein vask på kvelden då solkremen kan tette porene deira, slik som hjå oss, seier Bruer.
Hunden treng vatn i varmen
Med solkrem på kroppen kan Jazz kose seg ute. Men han må framleis passe seg for å ikkje bli for varm i sola.
Mathilde Bruer har og nokre tips til korleis du kan gjere varme dagar betre for hunden din.
- – Vatn er viktig. Dei kjøler seg ned ved å drikke kaldt vatn.
- – Vask magen, brystet og ansiktet. Hundar sveittar ikkje på same måte som oss og treng hjelp til å kjøle ned kroppen.
- – La dei ligge i skuggen på kaldt gras. Kaldt gras er godt for hunden.
Les også: