– Folk er ikkje klar over kor strenge reglane kan vere, seier overbetjent Roger Hansen i utlendingsseksjonen i Søndre Buskerud politidistrikt.
Den 23. juni vart ein 20 år gamal mann frå Romania arrestert for å ha stole ei flaske Jack Daniels brennevin frå Vinmonopolet i Drammen. Han godtok eit førelegg på 2000 kroner for tjuveriet, og det utløyste ei rekkje med hendingar som til slutt førte til utvising. Politiet hadde ikkje noko negativt registrert på mannen frå tidlegare.
Kort veg til utvising
Det er ikkje politiet som utviser utlendingar for slik småkriminalitet. Det er ei vurdering som blir gjort av Utlendingsdirektoratet, forklarar overbetjent Hansen.
– Vi vurderer fleire høve når utlendingar blir tatt for kriminalitet. Mannen hadde nesten ingen pengar å leve av, kunne ikkje gjere greie for kjenningar eller familie han skulle bu hos her. Når han i tillegg gjer seg skuldig i ulovlege handlingar tre-fire dagar etter at han har kome til landet, legg vi to og to saman.
Det neste politiet gjer er å starte ei utvisingssak etter Utlendingslova §122. Den gjeld utvising av omsyn til offentleg orden eller tryggleik. Mannen får varsel om at denne prosessen er i gang. Han får moglegheit til å kome med ein uttale i saka. UDI si hastevakt gjer vurderingar rundt hans konkrete situasjon i Noreg.
– Han fekk eit vedtak om utvising i to år for tjuveriet og vart sett på flyet allereie dagen etter han vart tatt, seier Hansen.
Dersom mannen ikkje betalar førelegget og blir arrestert i Noreg, sjølv etter å ha halde seg unna i to år, kan han måtte sone i fengsel for det.