– Eg fekk litt sjokk faktisk da eg sat på pressekonferansen i VM. Dei meinte jo tydelegvis at eg var favoritt.
Kristine Stavås Skistad har klart å legge det meste av skuffinga frå fallet i VM-sprinten bak seg. Det har vore godt å kome heim frå oppstyret i VM der 20-åringen blei overraska over å bli sett på som den store favoritten.
– Ein innser jo at folk har trua på meg. Og eg føler eg viste i VM at eg hadde noko å gjere der.
– Veldig motivert for å ta revansje
Framleis synest ho det er surt å tenkje på at ho kunne kjempa om gullet i VM utan fallet i semifinalen.
Men sidan VM har ho tenkt mest på å ta revansje.
– Eg har vore veldig motivert i etterkant og er utruleg lysten på å ta revansje. Håpar eg får den i Drammen eller Falun.
Skistad-effekt på billettsalet
Tysdag går ho sprinten i heimbyen Drammen. Billettsalet har tatt av nå som byen har fått sin eigen store stjerne. 20-åringen har aldri gått sprint i klassisk mot dei aller beste før, men er sikker på at ho kan vinne.
– Det blir spennande å sjå kor fort dei beste går klassisk. Viss eg er med nedover til oppløpet trur eg at eg har veldig gode moglegheiter. Eg håpar å kjempe om sigeren, er Skistad ærleg på.
NRKs langrennsekspert Torgeir Bjørn trur Skistad kan få sin store revansje på heimebane.
– Kristine har vist før i vinter kva slags enorm fart ho har på eit oppløp. Ho er ein av dei største seiersfavorittane saman med Nilsson, Falla og Dahlquist. Men eg trur dei alle tre fryktar Skistad, seier Bjørn.
Løypa er korta ned: – Fordel for Skistad
Arrangørane kan også ha gjort revansjen enklare for Skistad. Oppløpet er gjort 30 meter kortare og er ikkje like bratt mot slutten som i dei 16 tidlegare utgåve av bysprinten. Fordel Skistad meiner både eksperten og hovudpersonen sjølv.
– Det vil eg absolutt seie er fordel meg, gliser Skistad og sender eit lite stikk til verdsmeister Falla.
– Eg veit at ho har Drammen som yndlingsarena, så det må me prøve å gjere noko med.