– Det er ingen andre land i verda som har eit frivillig opplegg som vårt, konstaterer påskegeneralen i Røde Kors.
Odd Inge Blakkestad er hans namn, «redning» er hans mellomnamn – og han høyrer fjellet til.
Sidan tidleg på 1990-talet har Blakkestad vore sentral i påskeberedskapen på Golsfjellet.
Sagt på ein annan måte: I over 30 år har han redda liv i høgdedraget.
Nå er han atter klar for det han omtalar som høgdepunktet til dei frivillige, nemleg å vere parat og påliteleg i påskefjellet.
Hundrevis som må fraktast ned frå fjellet
I løpet av eitt år hjelper Røde Kors i snitt 1000 menneske som har gått seg bort eller skadd seg på tur.
Påskeveka i fjor blei hektisk. Totalt rykte hjelpekorpsa ut på til saman 321 oppdrag, og dei hjelpte til ved 501 skader over heile landet.
I snitt dei siste 15 åra har Røde Kors blitt kalla ut på 209 oppdrag i påskeveka.
Kva kjem da av den store oppdragsmengda påska 2023?
– Gode vêrmeldingar, kanskje oppfordringar om å feriere i heimlandet og usikker økonomi kan vere nokre av årsakene til at veldig mange valde ferie i Noreg, svarer Tor Øyvind Bertheussen, seniorrådgjevar søk og redning i Buskerud Røde Kors Hjelpekorps.
Det enkle reknestykket: Fleire i fjellet, fleire skader, ifølge Bertheussen.
– Sidan vi sjeldan veit kva hendingar som kjem, må me førebu oss breitt og godt:
- Skrubbsår
- Brotskadar
- Mange solbrente
- Hjartestans
- Snøskred, sørpeskred og jordskred
- Barn som tar ein tur på eiga hand
- Folk som grev seg ned på grunn av plutseleg vêrskifte
- Hundrevis av personar som må fraktast ned frå fjellet, skiløypa eller frå hytta og til næraste ambulanse
Meir enn ei dobling oppdrag samanlikna med fjoråret
For Buskerud Røde Kors blei påska 2023 travlare enn nokon gong.
Ifølge Blakkestad hadde dei rundt 70 oppdrag – meir enn ei dobling frå året før.
– Men det var oppdrag gjennom AMK-sentralen eller politiet. Vi behandla jo langt fleire pasientar, seier han.
Eit yrande påskefjell krev eit stort mannskap
Som vanleg er påskegeneral Blakkestad og familien på plass i hytta til Gol og Hemsedal Røde Kors onsdag før palmehelga.
På fredagen kjem dei fleste turistane – og med dei og etter kvart, oppdraga.
Frå kommandosentralen i hytta koordinerer Blakkestad alle hjelpeoppdraga i påska.
– Røde Kors-hytta begynner å nærme seg innrykksklar. Og det er veldig mange som har lyst til å vere med på vakt i år. Det kjem til å bli eit godt team når vi må ut og gjere noko, seier han.
Han veit kva som kjem til å skje – og kva som ikkje kjem til å skje. Han er førebudd på alt.
I år er det tidleg påske. Fjellet er innbydande med upåklagelege forhold. Røde Kors forventar derfor rekordmange turistar i den norske påskefjellheimen.
– Gnistrande forhold og mykje snø! Får vi litt blå himmel og sol oppå det heile, så kjem det til å bli eit yrande påskefjell i år, det er heilt sikkert, slår Blakkestad fast.
Påska er for mange nordmenn synonymt med kylling og egg, krim og kryssord, solbrente nasetippar og påskeharesmågodt.
Og så klart, mange spenner på seg skia og legg i veg i veg mot bergtoppane.
– Kor mange frivillige er det i Røde Kors Buskerud si teneste denne påska?
– Det er rundt 150 på vakt heile tida. Nokon på hytta, nokon på heimevakt. Og så har vi 200 i bakhand som kan trø til når noko skjer. Så vi er 350 i Buskerud som er operative, svarer Blakkestad.
Viktig å vere førebudd før skredet går
Den frivillige troppen til påskegeneralen er nå i full gang med trening og førebuingar inn mot den gule høgtida.
- Varer og materiell skal handlast inn.
- Vaktlister og logistikk må vere spikra.
- Mange hjelpekorps har eigne kioskar som skal fyllast med diverse varer.
– Majoriteten av det vi driv med handlar om å hente pasientar som har vore uheldige i skiløypene, seier Blakkestad.
Vidare kan det vere alt frå å reparere skibindingar og lindre gnagsår, til å handtere sjukdom og beinbrot.
– Vi har tett dialog med AMK-sentralen, hjelper etter behov, og snøskuterane er alltid i beredskap. Som regel handlar det om å få folk trygt fram til bilveg der ambulanse eller anna hjelp ventar, seier Blakkestad.
Dei frivillige har rekruttert mange nye som skal ut for første gong i påska.
Da gjeld det å vere godt førebudd og ha grunnlaget på plass, i tilfelle det må trykkast på den store alarmknappen.
– Skredfaren er absolutt til stades med tanke på snømengdene. Da er det viktig for dei nye å vite kva oppgåvene er. Når det i så fall skjer, så har ein ikkje tid til å begynne å teikne og forklare mykje, seier påskegeneralen.
– Og rekorden frå i fjor, den ønsker dykk kanskje ikkje å slå i år?
– Nei. Vi er jo på vakt for ein grunn, og det er alt anna enn for å drikke kaffi og spele kort. Eg seier ikkje at vi håpar på å slå fjoråret, men vi er der fordi vi har lyst til å hjelpe til når det trengst. Og det vil vere behov for oss i år òg, det er eg sikker på.
– Da er påsketuristane i trygge hender?
– Det skal eg garantere at dei er, avsluttar påskegeneralen med eit Røde Kors på halsen.