Full krangel mellom Iran og Saudi-Arabia etter Mekka-tragedie

Dei saudiske styresmaktene sitt offisielle dødstal etter tragedien der mange hundre menneske vart trampa i hel i Mekka, er 769 døde. Men dødstala varierer, og Irans øvste leiar, Ayatollah Ali Khamenei, meiner at meir enn 1000 pilgrimar døde i ulykka.

Også framfor Saudi-Arabias ambassade i Iran har det vore store protestar mot saudiske styresmakter og deira handtering av tragedien.

• Saka held fram etter TV-innslaget frå NRKs besøk i Mekka denne veka.

– Saudi-Arabia må ta ansvar

Khamenei krev no ei unnskylding frå Saudi-Arabia, som han meiner ikkje hadde gjort ein god nok jobb for å ta vare på tryggleiken i området der ulukke skjedde. Han kallar arabarane for inkompetente.

• LES OGSÅ: – Saudi-Arabia mangler strategi for å regulere menneskehavet

– I staden for å legge skulda på det eine og det andre, så burde saudiarane akseptere at dei har ansvar, og be om unnskyldning til muslimane og offera sine familiar, står det i ein tekst på Khamenei si eiga nettside.

Han seier den muslimske verda har mange spørsmål, og understrekar at «dødsfalla til meir enn 1.000 menneske er ikkje noko lite tema».

Ifølgje dei offisielle tala skal 144 av dei døde pilegrimane ha vore iranske, og 323 iranarar skal framleis vere sakna etter tragedien.

• LES OGSÅ: – Vi finner trøst i håpet om at de kommer til paradis

– Iran burde vite betre

Svaret frå styresmaktene i Saudi-Arabia er at Iran prøver å bruke tragedien som ein moglegheit til å utøve politikk.

– Iran burde vite betre enn å lage politikk ut av ei tragedie som har råka folk som utførte ein av deira mest heilage religiøse ritar, seier Saudi-Arabias utanriksminister, Adel al-Jubeir, som er i New York for å delta på FNs høgnivåveke, nett slik også Rouhani er.

• LES OGSÅ: – Tragedien skremmer ikke muslimer fra å dra til Mekka

Utanriksministeren seier at Saudi-Arabia skal gjere alt dei kan for å finne ut kva som skjedde, og at dei vil offentleggjere informasjonen så snart den kjem. Han seier også at Saudi-Arabia har lange tradisjonar med å bruke enorme ressursar for å prøve å oppnå suksessrike pilegrimsreiser.

Saudi-Arabia har mellom anna sagt at ulukke kan ha skjedd fordi pilgrimar ikkje følgde ordre. Men mange av dei som var til stades har klaga på stengde vegar, dårleg organisering og høge temperaturar.