Det kjem fram i statsbudsjettet som vert lagt fram onsdag føremiddag.
– Regjeringa har varsla at den vil trappe opp satsinga på rekrutteringsstillingar i universitets- og høgskulesektoren kraftig. Det skal trappast opp med 500 stillingar frå 2015 til 2018, seier stortingsrepresentant Norunn Tveiten Benestad frå Høgre i Vest-Agder.
I budsjettet som vert lagt fram onsdag ligg det inne 47 nye rekrutteringsstillingar over heile landet, som skal styrkje forskarutdanning innan profesjonsfaga. Det vil seie fag som sjukepleiar-, lærar-, ingeniør-, og teknologiutdanning.
– UiA er øyremerkt med fire av stillingane. Det tilsvarar ei satsing på 4,5 millionar kroner, seier Tveiten Benestad.
– Regjeringa har sagt at ein både i budsjett og langtidsplanar vil prioritere forsking og utdanning, som kan bidra til å løyse dei store samfunnsutfordringane vi står overfor. Då veit vi at både skule- og helsesektoren er viktige i forhold til det. Å styrkje dei teknologiske miljøa er viktig i forhold til å kunne handtere omstilling i næringsliv og sikre verdiskaping i landsdelen, seier stortingsrepresentanten.