Ny meiningsmåling: I år kan det bli Jenny som gliser breiast

Dei to partia har framleis reint fleirtal ifølgje målinga, men med Sp som største parti kan det bli Jenny Følling som tek over fylkesordførarvervet etter Åshild Kjelsnes frå Ap.

Meiningsmålinga gir Følling meir energi i valkampinnspurten.

– Eg synest det er veldig kjekt og det gir inspirasjon til å stå på vidare, for vi har veldig mykje å kjempe for i fylket vårt.

Må jobbe hardt i innspurten

Medan Senterpartiet fekk 25,7 prosent og var nest største parti ved fylkestingsvalet for fire år sidan, er partiet no størst med 27,7 prosent i den ferske målinga.

Arbeidarpartiet går tilbake frå 27 prosent til knappe 25 prosent. Dette vil gje Senterpartiet ni mandat på fylkestinget, medan Arbeidarpartiet vil få åtte.

Fylkesordførar Åshild Kjelsnes har ikkje noko god forklaring på at Arbeidarpartiet har gått tilbake.

– Eg kjem til å arbeide hardt dei neste dagane med å synleggjere våre saker, og det kjem alle våre medarbeidarar til å gjere. Så må vi oppmode alle veljarane som sympatiserer med oss om å gå til stemmeurnene viss dei framleis vil ha Arbeidarpartiet i styringa.

• Les også: Meiner Årdal er ein inspirasjon for resten av Arbeidarpartiet

Avviser at valkampen har vore mislykka

– Om denne målinga blir valresultatet, så er vel ikkje du fylkesordførar lenger, eller korleis ser du på det?

– Eg er veldig klar og motivert til å ta mi andre vakt for dette flotte fylket. Men det er veljarane som har det avgjerande ordet.

I høve meiningsmålingar frå i fjor og april i år har Arbeidarpartiet gått sterkt tilbake. Kjelsnes avviser at valkampen har vore mislykka.

– Nei, valkampen er ein prosess.

Trur på valsiger

Miljøpartiet De Grønne får i meiningsmålinga 3,7 prosent, noko som ville gitt eitt mandat i fylkestinget. For fire år sidan fekk MDG berre 0,6 prosent.

Høgre går tilbake frå knappe 17 prosent til 14,2 prosent. For dei andre partia er det svært små endringar i høve fylkestingsvalet for fire år sidan.

Jenny Følling har tru på valsiger og at ho sjølv kjem til å entre fylkesordførarkontoret.

– Vi skal stå på for fylket sine interesser, lovar ho.

– Kvifor vil du vere ein betre fylkesordførar enn Åshild Kjelsnes?

– Eg tenkjer eg vil vere ei klar og tydeleg røyst og ein synleg frontfigur for Sogn og Fjordane.

• Les også: Her sette Senterpartiet nesten rekord
• Les også: Senterpartiet med sterkt resultat Ap-bastion

– Heilt ope

Åshild Kjelsnes i Ap meiner det er heilt ope kven som blir størst av Ap og Sp.

– Dette viser at det er tett løp på oppløpssida, og dette motiverer meg til å stå på denne siste veka.

– Kvifor vil du vere ein betre fylkesordførar enn Jenny Følling?

– Eg høyrer til landets største parti og har gode kontaktar som eg har opparbeid meg dei siste fire åra.