No er Gudvangatunnelen open for fri ferdsle igjen

– Ja, klokka 23 i går kveld kunne vi opne vegen igjen, seier Avdelingsdirektør Svenn Egil Finden i Statens vegvesen.

11. august tok det fyr i ein svensk turistbuss i Gudvangatunnelen. 37 personar måtte evakuerast, og den 11,4 kilometer lange tunnelen vart stengd for trafikk.

Raskare enn rekna med

Då tunnelen vart stengd etter brannen rekna ein med at det kunne ta seks veker å utbetre skadane, basert på erfaringane frå den førre tunnelbrannen for to år sidan.

– Straks etter brannen så var det vanskeleg å seie noko om omfanget, og då er det vanskeleg å gå ut å vere for optimistisk overfor publikum. Vi må vere realistiske og ta omsyn til at det kan ta lang tid.

Men reparasjonsarbeidet har gått raskare enn venta, etter to veker kunne ein opne for kolonnekøyring for tungtrafikken , og i natt vart altså arbeidet avslutta.

• Les også: Blir ikkje heilt stengd likevel
• Les også: – Det lokale næringslivet blei gløymt etter tunnelbrannen

– Takka vere ein del av arbeidet som vart gjort etter førre brann, så gjekk det raskare denne gongen.

Etter brannen for to år sidan vart det gjort ein del oppgraderingar , blant anna når det gjeld det elektriske, som gjorde at det var enklare å reparere skadane denne gongen.

Førebels ikkje klart kva det kostar

Før det blei opna for trafikk sundag kveld, vart alt utstyr i tunnelen testa for å sikre at alt fungerer slik det skal. Kva den endelege prislappen på reparasjonsarbeidet blir er førebels ikkje klart.

• Les også: Han hindra endå ein brann i Gudvangatunnelen

– Det er for tidleg å seie, vi har ikkje fått inn alle kostnadane enno, så vi jobbar framleis med å få på plass eit kostnadsoverslag, så kva dette kjem til å koste, det må vi kome attende til.