E39-striden prega valet i Nordfjord

– Eg er kjempeskuffa over resultatet i vår kommune, eg synest det er veldig synd, seier leiar i Eid Ap, Siri Sandvik.

Eid og Gloppen var landets dårlegaste Arbeidarparti-kommunar, medan Høgre i Gloppen er den tredje dårlegaste Høgre-kommunen i landet.

Striden om kvar E39 skal gå gjennom Nordfjord i framtida blir trekt fram av fleire som ei forklaring. Både Ap og Høgre vil ha brukryssing i indre, og folk i Eid og Gloppen har kjent seg svikta.

– Ein ser at når slike enkeltsaker får så stor betydning, så er det slik som skjer, seier Sandvik.

• Sjekk valresultatet i din kommune her

E39 og sjukehus

Med ti prosent oppslutnad i Eid og Gloppen er dei to nordfjordkommunane dei dårlegaste Ap-kommunane i heile landet.

Siri Sandvik som er leiar i Eid Ap trur partiet får unngjelde både for sitt standpunkt i spørsmålet om kvar E39 skal krysse Nordfjorden, og for si rolle i striden om sjukehuset på Nordfjordeid.

Ei sak som vart avgjort for vel to år sidan, der Ap ikkje gjorde noko for å stogge nedbygginga av lokalsjukehuset.

I begge sakene er lokallaget i Eid på kollisjonskurs med moderpartiet, og på Nordfjordeid er det to saker folk er opptekne av.

– Det er jo klart dette har med linjevalet for E39 å gjere, det seier seg sjølv, seier ein mann NRK snakka med på gata i Eid.

– Dei ville ikkje hjelpe oss når vi trengde dei, seier ein annan og peikar på den betente sjukehussaka.

• LES OGSÅ: Slik viser trailersjåføren sitt syn på kvar E39 bør gå
• LES OGSÅ: Eid Arbeiderparti håpar E39-striden snart løyser seg

Trur vinden vil snu

Men Siri Sandvik trur vinden vil snu for Arbeidarpartiet i Eid.

– Ja, det trur eg.

– Kor fort det vil gå, det står att å sjå. Men eg tenkjer at det berre kan gå oppover frå no av, seier Sandvik.

• LES OGSÅ: Navarsete snur - går for Stigedalen som framtidig E39
• LES OGSÅ: Fleire Ap-leiarar positive til E39-tilbod

(Artikkelen held fram under biletet)

– Ikkje noko vi er stolte over

Leiar Olin Johanne Henden i Gloppen Høgre kan ikkje skulde på sjukehusstriden for det sørgjelege valet.

Partiet vart tredje dårlegaste høgrekommune i landet med 7,1 prosent oppslutnad. Ved kommunevalet i 2011, før Bjørn Lødemel gjorde kuvending i saka om kvar E39 bør ligge, hadde partiet 18 prosent oppslutnad.

– Slik sett er vi ikkje overraska over resultatet, men vi er skuffa. Gloppen var den femte beste høgrekommunen ved sist val, og no ligg vi på sisteplass.

– Det er ikkje noko vi er stolte over i det heile teke, seier Henden.

Håpar å vere tilbake om to år

Då Lødemel i vinter snudde, og gjekk for E39 via Stryn og ikkje Anda-Lote, var reaksjonane i Gloppen Høgre sterke. Dei hadde invitert stortingspolitikaren til årsmøtet, men etter snuoperasjonen ville dei ikkje ha han på besøk likevel. Lokallaget har heller ikkje drive valkamp for Lødemel.

• LES OGSÅ: Lødemel uønskt av Gloppen Høgre
• LES OGSÅ: No vil Lødemel ha E39 om Stryn

– Trur du det blir med dette protestvalet her?

– Vi var jo det største opposisjonspartiet til Senterpartiet i kommunen ved sist kommuneval, og hadde ein oppslutnad på vel 17 prosent for to år sidan. Så vi håpar å kome opp att på det nivået ved neste val om to år, seier Henden.

Ser protestval fleire stader

Redaktør i Fjordingen, Bengt Flaten, ser også protestval i Stryn og Hornindal. Han meiner E39-saka har hatt mykje å seie også der.

– I Stryn har Høgre ei auke på formidable 14 prosent og nærmar seg 30 prosent. I Hornindal går dei opp 2,9 prosent og får 22,6 prosent i Bjørn Lødemel si heimkommune.

– I begge kommunane går Senterpartiet betydeleg tilbake, med 11 prosent tilbake i Stryn og 6,7 prosent i Hornindal. Det er merkbart, seier Flaten.

Redaktør Bjørn Grov i Firda Tidend har også lagt merke til det han meiner er E-39 effekt i valresultatet.

• LES OGSÅ: Meiner E39-saka gjorde utslaget i Gloppen

– Greitt at viktige saker syner att

Men sjølv om Siri Sandvik i Eid Ap er kjempeskuffa over valresultatet meiner ho det er greitt at viktige saker syner igjen når folk går til urnene.

– På ein måte er det jo det. Det viser kva folk er opptekne av lokalt, og det viser at som fylkespolitikar eller rikspolitikar så må ein høyre på kva folk seier i alle delar av regionen eller fylket.

– Ein kan ikkje berre la vere å bry seg og tru det ikkje har konsekvensar. Det er slik demokratiet er, det er folk som bestemmer til sjuande og sist.