Byggjer ny fjøs til 60 kyr for 12 millionar

Fjøsteikningane er klare og om nokre månader blir spaden sett i jorda. Arne Einar Reed (50) sin nye lausdriftsfjøs vil ha plass til 60 mjølkekyr, 50 oksar og mange kalvar. Kostnadsoverslaget er på vel 12 millionar kroner.

Planen er å produsere ein halv million liter kumjølk i året. Reed produserer i dag 130.000 liter, og for å kunne produsere ein halv million liter i året, må han kjøpe og leige kvotar.

– Dersom er skal byggje nytt må eg gjere det no. Det har med min eigen alder og neste generasjon å gjere, seier han.

• Les også: Uroa over forgubbing i landbruket

Forbod mot båsfjøs i 2024

Prosjektleiar i Tine, Jo Helge Sunde, fortel at Reed er ein av mange bønder i fylket som satsar stort.

– Dei siste åra er det kvart år bygd mellom 10 og 12 store robotfjøs. I fjor vart det bygd heile 14 slike fjøsar i fylket, seier han.

– Kva er årsaka til at det blir bygd så mange nye store fjøsar i Sogn og Fjordane?

– Ein viktig grunn er dei nye krava som gjeld frå 2024, då dei aller fleste mjølkekyr skal over på lausdrift. I tillegg er stell av nye fjøsar med mjølkerobot langt mindre arbeidskrevjande. Klart det er lokkar bøndene, seier han.

• Les også: Historisk høge overføringar med blåblå regjering

Stor pågang

Anton Kandal i Kandal Bygg fortel at det er stor pågang etter nye, store fjøsbygg.

– Vi byggjer hovudsakleg fjøsar som har plass til mellom 40 og 60 mjølkekyr. Samanlikna med nokre år sidan er dette veldig store fjøsar, seier han.

Firedobling på 30 år

For 20 år sidan var den gjennomsnittlege mjølkekvoten i fylket 60.000 liter, i dag er den 120.000 liter og om 10 år vil kvoten kome opp i 250.000 liter, trur Sunde.

– Likevel vil Sogn og Fjordane ha dei minste mjølkebruka i landet. Det vil vi truleg ha for all framtid, seier han.

• Les også: Listhaug: – Det er optimisme i landbruket