Bussen skal ha hamna i grøfta i Luster etter at ein stoppa for ein møtande trailer og stod i ro. Då bussen skulle køyre att byrja bussen å skli og hamna i grøfta.
Det var elevar ombord i bussen, men i følgje busselskapet vart ingen skadde i uhellet.
– Bussen er på vegen att etter at den raskt etter uhellet vart dratt opp att av grøfta, seier Per Steinar Sviggum i Nettbuss.
Det skal ha vore svært glatt på staden.
Lastebil hamna i grøfta
Litt seinare hamna ein lastebil i grøfta i Fjærland, og det låg ved 13-tida også ein personbil med tilhengar i grøfta i Bøyadalen.
Likevel melder Vegtrafikksentralen om betre forhold på vegane i Sogn og Fjordane enn på fleire dagar.
– Det er i ferd med å tine litt opp, og det er mildare no. Samstundes er det rasfare fleire stader, seier Roger Nedberge Hille.
I GRØFTA: Her enda turen for lastebilen i Fjærland. Bilbergar er på staden og jobbar med å få han på vegen att.
Foto: Jo Marius BøyumRasfare og kolonnekøyring
Vegvesenet har stengt fylkesveg 55 inst i Esefjorden mellom Balestrand og Dragsvik på grunn av ras og rasfare. Her vil det ikkje bli opna i dag. Også Ulvestad - Menes på fylkesveg 152 er stengd på grunn av fare for ras.
Over Vikafjellet på riksveg 13 har det vore kolonnekøyring på grunn av uvêr. Like før klokka 13 melder Vegtrafikksentralen at fjellet er stengt på grunn av ras i Hola på Hordalandssida.
– Elles er det stort sett greie køyreforhold, med unnatak av litt snø og slaps einskilde stader i Nordfjord, seier Nedberge Hille.
STENGT: Eit snøskred sperra fylkesveg 55 i Esebotn.
Foto: Tipsar
