Regimet i Syria ber søndag om eit nytt krisemøte i Den arabiske liga, etter at forbundet i går vedtok å suspendera Syria som medlem, og å innføra økonomiske og politiske sanksjonar mot landet.
Føremålet med eit nytt hastemøte er å diskutera «dei negative konsekvensane av den arabiske situasjonen», ifølgje statleg syrisk fjernsyn.
- LES OGSÅ: –Syria går mot borgerkrig
– Vestleg agenda
Den arabiske liga vedtok laurdag å suspendera Syria frå forbundet, som følgje av nye valdshandlingar og drap på demonstrantar.
USA og EU hyllar ekskluderingsvedtaket, som trer i kraft onsdag 16.november. Syriske styresmakter er i harnisk, og meiner ligaen følgjer ein vestleg og amerikansk agenda.
Syria ønskjer truleg ein ny sjanse til å overbevisa ligaen om at ekskluderinga ikkje er rettkomen og bør bli annullert.
Ein talsmann for utanriksdepartementet i Algerie seier søndag kveld at utanriksministrane til medlemslanda i forbundet skal ha eit møte om situasjonen i Syria onsdag. Møtet skal foregå i Rabat, hovudstaden i Marokko.
Fredsplan stoppa ikkje valden
Så langt er, ifølgje FN, minst 3500 menneske drepne i den åtte månader lange blodige konflikten i Syria, der opposisjonen krev at presidenten Bashar al-Assad går av.
Søndag skaut og drap syriske regjeringsstyrkar åtte personar som ropa slagord mot presidenten under ein organisert pro-Assad demonstrasjon i byen Hama.
Dei grufulle handlingane held fram, til tross for at syriske styresmakter i starten av november gjekk med på ein fredsplan frå ligaen.
- LES OGSÅ: Bekymring for nye drap i Syria
Fredsplanen krev at politiske fangar slepp fri, at hæren trekkjer seg ut av fleire byar, og at journalistar og observatørar får bevega seg fritt i landet.
Menneskerettsgrupper i landet hevdar at regimet i staden har intensivert kampen mot opposisjonen, særleg i byen Homs som i lengre tid har vore kringseten av regjeringsstyrkar.
Nei til vestleg intervensjon
I februar ekskluderte vart Libya ekskludert frå ligaen som følgje av overgrepa mot sivile. Suspensjonen var avgjerande for at FN valde å gje klarsignal til NATO-operasjonen som omsider bidrog til styringa av Muammar Gaddafi.
Sjølv om det er usannsynleg at det vil bli sett i gang ein vestleg militæroperasjon i Syria som følgje av dei ferske sanksjonane, vil dei krasse reaksjonane frå ligaen truleg oppmuntra det internasjonale samfunnet til å leggja større press på regimet.
– Me ønskjer ikkje utanlandsk intervensjon i Syria. Me vil ikkje væpna opposisjoner eller innføra flyforbod, seier Sheikh Hamad bin Jassim, som er statsminister i Qatar.