Mandag ettermiddag denne veka gjekk ei eldre kvinne frå Asia feil og hamna på internasjonal sone i avgangshallen på Gardermoen då ho skulle til Tromsø.
Feiltrinn og desperasjon
Når kvinna innser feiltrinnet, snur ho og set kursen mot innlandspiren. Men då grip først to vektarar frå selskapet G4S inn og held henne igjen. Seinare kjem fleire vektarar til. Fortvila over å ha kome bort frå mannen sin og resten av reisefølget, viftar kvinna med boardingkortet og peiker på det ho meiner er rett utgang for å vise kor ho skal.
Ho prøver desperat å koma seg til innlandspiren, men då tar vektarane verkeleg grep og held henne fast, dyttar henne bort og pressar henne tilbake til internasjonal sone. Det endar med at ho blir liggjande på golvet.
Kvinna blir meir og meir stressa, men klarer ikkje å uttrykke seg på engelsk eller noko anna språk som vektarane forstår.
Folk reagerte med avsky
Flere reisande observerte opptrinnet og reagerte med avsky, fortel eit augevitne som ikkje vil stå fram med namn og bilete til NRK.
– Den eine vektaren syntest tydeligvis situasjonen var festleg, for han smilte og lo, fortel ho.
– Alle som blei stående og sjå på reagerte på den omtrent valdelege behandlinga vektaren ga henne. Dessverre fekk ingen av oss filma situasjonen.
Men både politiet og OSL har sett video som blei tatt av overvakingskamera, og det var ikkje noko vakkert syn, i følgje informasjonssjef Jo Kobro i OSL. Både han og politistasjonssjef Pål Sørhagen på Oslo Lufthavn stadfestar historia.
Forstår reaksjonen
OSL-sjef Jo Kobro ønskjer å komme i kontakt med kvinna.
Foto: Gunnar Sakshaug / NRK– Eg forstår godt at publikum reagerte på det dei såg. Vi ventar på ein rapport frå vaktselskapet G4S før vi foretar oss noko meir i saka, seier Kobro.
Den asiatiske kvinna klarte etter kvart å koma seg laus og sprang nedover mot innlandspiren og utgangen til flyet til Tromsø. Politiet stadfestar at dei fekk kontakt med henne der og at ho fekk dra vidare til Tromsø utan omveg via tollen.
– Dette er inga god sak for oss
– Der er berre å vedgå at dette ikkje er ei god sak for oss. Vi prøver å kontakte kvinna og reisefølge for å beklage hendinga, sier Kobro.
Han forklarer opptrinnet med at alle reisande som går inn på internasjonal sone på flyplassen, skal ut igjen via tollen, også dei som har gått feil.
– Det er bakgrunnen for at vektarane greip inn. Men dei har ikkje lov til å bruke fysisk makt, og dama fall etter halding og dytting. Rutinane skal vera at vektarane skal tilkalle politiet og elles berre fotfølgje vedkomande til politiet er på plass, legg han til.
Vil beklage det som skjedde
Situasjonen løyste seg då politiet til slutt kom fram til kvinna og mannen som venta ved Tromsø-flyet.
– Sjølv om dette løyste seg til slutt, vil vi gjerne ha tak i henne for å beklage det som skjedde, sier Kobro.
– Kva skjer med selskapet G4S?
– Vi avventar ein rapport. Selskapet må sørge for at alle tilsette har regelverket godt innunder huda og ikkje går ut over dei grensene som er sett, seier Kobro.
Legg seg heilt flat
G4S blei i slutten av 2007 tildelt kontrakten på tryggleikskontroll på Oslo Lufthavn.
I dag legg administrerende direktør i G4S, Rolf Gunnar Reisænen, seg heilt flat etter vektarane sin oppførsel mandag.
– Det er ingen tvil om at dei braut instruksen. Eg har sjøl sett videoen, og har hatt samtalar med dei som var involverte i episoden. Dette blir ei personalsak, men den tar vi ikkje i media. Vi har levert rapport til OSL der vi legg oss heilt flate, seier han.
Politistasjonssjef Pål Sørhagen seier til NRK.no at dei har tillit til at G4S etter dette tar dei grep som må til for at alle tilsette i selskapet held seg innafor grensene for kva vektarane skal gjera.
– Vi ser at dei tar dette på alvor etter det som skjedde mandag, seier Sørhagen.
