I eit kommunestyremøte torsdag vart det avgjort at kommunen ikkje tek seg råd til å dele ut gratis bleier.
Politikarane sa i tillegg nei til å gi 5000 kroner i tilskot til barnevogn.
– Det er flott at folk kjem med slike gode idear, for vi treng dei. Men eg trur ikkje dette er tingen som verkar. No skal vi i staden komme på besøk med ein blomst eller ein velkomstpakke, seier varaordførar Margit Smeland (Sp) til NRK.no.
«Up and go!»
Kommunen hadde tidlegare ei velkomstpakke til tilflyttarar. Denne vert no funne fram igjen. Den inneheld eit velkomstbrev, nyttig informasjon, krus, handkle og diverse andre effektar.
Det var Ap-politikar Tore Konnestad som kom med forslaget i februar i år. Bakgrunnen var at kommunen slit med å få folk til å flytte til Åmli.
– Eg meiner dette er framtida for Åmli, nemleg barn. Difor har vi kalla konseptet «up and go», sa kommunestyrerepresentant, Tore Konnestad (Ap) til NRK.no.
Kommunen har i dag for få barnefødslar til å halde folketalet opp. Det vert kun fødd 15 barn i året i Åmli.
Gratis bleier ville ha kosta kommunen rundt 160 000 kroner i året.
Rådmannen sa nei
Rådmann Bjarte Nordås gjekk tidlegare denne månaden imot gratis bleier. Han trur ikkje gratis bleier i seg sjølv vil lokke folk til kommunen.
– Etter mi meining er det fire ting som er viktig for at folk skal flytte til Åmli. Kommunen sin attraktivitet, arbeidsplassar, familiær tilknyting og kommunal infrastruktur, sa Nordås til NRK.