Fem personar er sikta for lekamsskading eller medverknad til dette i saka. Tre av dei er kvinner, den yngste er berre 15 år.
Etter det NRK erfarer blei den døde funnen i gangen i leilegheiten i bydelen Kampen, like utanfor Stavanger sentrum. Ifølge forsvararen til ei av jentene som er sikta i saka, Arvid Sjødin, skal mannen ha blitt mishandla over fleire dagar.
- Slik eg forstår det er dødsårsaka mishandling. Skadene skal ha blitt påført av andre, seier Sjødin.
Vald med ulike gjenstandar
Valden mot 28-åringen skal ha blitt utført med ulike gjenstandar, og etter det NRK erfarer skal den utløysande årsaka til valden berre vera snakk om ein bagatell.
NRK har også vore i kontakt med naboar i området der den døde mannen blei funnen. Ein av dei høyrde ein mann ropa om hjelp i går. Naboen fortel også om to smell som høyrdes ut som skot.
Obduksjonsrapport klar over helga
Ifølge advokat Sjødin mistar enkelte alle motførestillingar når mishandling føregår i grupper.
- Eg veit ikkje om dette har skjedd i denne saka, men kan heller ikkje utelukka det, seier han.
Obduksjonsrapporten av avdøde blir truleg klar over helga. Vidare varetektsfengsling av dei sikta blir vurdert søndag, skriv politiet i ei pressemelding.
Politiet hadde laurdag ettermiddag gjennomført avhøyr av alle sikta i saka. I tillegg er naboar og vitne avhøyrde.