Fjordfylket er det tredje største kraftfylket i landet. Men fossane og elvane som renn langs dei bratte fjellsidene gir ikkje berre straum.
Også pengane som dei største kraftverka tener, renn ut av fylket.
– Eg vil tru at kring 85 prosent av verdiane som dei store kraftselskapa skaper, lekk ut av fylket, seier seniorforskar Johannes Idsøe ved Høgskulen i Sogn og Fjordane.
Produserer 14,5 TWh
Kraftverka i Sogn og Fjordane produserer nok straum til å forsyne heile Oslo, samt eige forbruk. Verdiskapinga er på solide seks milliardar kroner årleg.
1 TWh svarar til heile Drammen sitt forbruk. På eit normalår er samla kraftproduksjon i Sogn og Fjordane 14,5 TWh.
- LES OGSÅ:
– Det er meir enn ti prosent av den samla produksjonen heile året i Norge. Det gjer Sogn og Fjordane til eit veldig viktig vasskraftfylke og eit viktig kraftfylke, seier seksjonsleiar i NVE, Håvar Hamnaberg.
Klarer ikkje fordøye
Idsøe trur ikkje at fylket ville klare å handtere milliardane det er tale om.
– Men dersom ein større del kunne nyttast lokalt så ville vi kunne få ei anna utviklingsbane reint økonomisk, med høgare økonomisk vekst i regionen, seier seniorforskaren.
Og framleis er det stort potensial for meir vasskraft i fylket.
Størst potensial i landet
NVE sine kartleggingar av elvane og vassdrag som ikkje er utbygde, viser at ingen andre fylke i landet har større potensial.
Sogn og Fjordane kan gi lys i vindauga til fleire hundre tusen husstandar.
- LES OGSÅ:
– Potensialet for å byggje ut nye kraftverk i Sogn og Fjordane er det største i landet. Med tal er potensialet på 7,2 TWh. Det er då nesten ein fjerdedel av potensialet i heile landet, seier Hamnaberg.
Difor forsvinn pengane
Utviklinga i dag står i sterk kontrast med situasjonen tidleg på 1900-talet. Då var potensialet i det rennande vatnet nærast ukjent. Fossespekulantanae som reiste rundt og kjøpte fallrettar herja i ei tid då ingen visste kva verdiar som låg i dei store vassdraga.
- LES OGSÅ:
Her ligg også hovudårsaka til at berre ein brøkdel av kraftpengane blir att i fylket.
– Vi har vel heller ikkje hatt ressursar til å stå for desse store utbyggingane. Så dette har ei lang historie, seier Idsøe.
– Trist politisk dag
Nær 100 år etter fossespekulantane si stordomstid, valde fylkespolitikarane i 2001 å selje 40 prosent av Sogn og Fjordane Energi til BKK i Bergen. Salssummen var 750 millionar kroner. Sidan salet har SFE betalt ut nær 900 millionar kroner i utbytte.
- LES OGSÅ:
Leiaren i energikomiteen på Stortinget, Erling Sande, var den gong ein purung representant i fylkestinget.
– Eg hugsar sjølv eg sat i fylkestinget då Sp stod åleine om å behalde eigarskapen til SFE, då ein selde delar av det til BKK, altså ut av fylket. Det hugsar eg som ein av mine tristaste dagar i politikken fordi vi såg i ettertid at vi hadde rett i vårt standpunkt, seier han.