Under nyttårstalen i 2001 lova statsminister Jens Stoltenberg at tida for dei store kraftutbyggingane i Norge er over.
Men næringspolitisk talsmann i Frp, Harald T. Nesvik, meiner 100 småkraftverk er eit verre inngrep enn 1-2 store. Han meiner tida for dei store kraftutbyggingane ikkje bør vere over.
- Det er ikkje slik som ein hevdar at mange småutbyggingar nødvendigvis har mindre miljøinngrep enn ei større utbygging, seier han.
300 har fått ja
Over 500 småkraftverk står i søknadskø hos NVE. 300 småkraftutbyggarar har fått konsesjon til å legge fossestryk i røyr.
I dag opnar statsråd Terje Riis Johansen Kjøsnesfjorden kraftverk på Jølster. Det nest største vasskraftprosjektet Stortinget har samtykka til. Styreleiar i kraftverket, Fredrik Behrens, seier det vil produsere like mykje som 40 småanlegg.
- Ser ein innover i Kjøsnesfjorden i dag, så ser ein det er pent. Det er lite å sjå innover, seier han om spora etter utbygginga.
Ynskjer stortingsmelding
Kraftverket på Jølster har kosta kring 900 millionar kroner, og er rekna som eitt av dei siste store kraftutbyggingsprosjekta. I tråd med statsministeren sin nyttårstale for snart ti år sidan.
Frp meiner Stoltenberg gløymer at småkraftutbyggingane er eitt vel så stort naturinngrep som store kraftverk.
- Då kan det vere merkbart betre både kostnadseffektiv og betre for miljøet. Det må vere mogleg å diskutere desse tinga og difor bør ein legge fram ei eiga stortingsmelding, meiner Nesvik.
Løner seg å bygge stort
Nesvik presiserer at han ikkje vil småkraftutbyggarane til livs, men seier at det i mange tilfelle er betre å samle småelvane i store kraftverk enn mange små. Han får delvis støtte hos Behrens.
Styreleiaren i Kjøsnesfjorden kraftverk er glad for at småkraftverk har auka den lokale interessa for kraftproduksjonen, men meiner det løner seg best å bygge stort.
- Småkraftverk er ikkje noko negativt. Tvert imot. Men ein må sjå på det enkelte område; kva som eignar seg for smått og kva som eignar seg for det større koordinerte anlegget, seier han.