Mål av Ruben Holsæter og Kim Tangedal sikra Førde sin aller første siger på heimebane i 2. divisjon på mange år, etter at laget dei siste sju åra har spelt i 3. divisjon.
Og jubelen stod i taket: Først var dei trampeklappa ut av bana av eit entusiastisk heimepublikum - deretter runga jubelen i garderoben.
- Dette var utruleg herleg, gliser trenar Knut Erik Folland etter at jubelen har stilna.
- Trur vi kan overraske
For Førde har fått ein langt betre start på comeback-sesongen i 2. divisjon enn skeptikarane hadde trudd på førehand.
- LES OGSÅ:
Førre helg spelte sunnfjordingane uavgjort borte mot Asker - ein av favorittane i avdelinga. Og laurdag vart det full pott heime mot Notodden - ein kanskje endå større favoritt.
Ikkje rart spelarane var i godlune etter kampen.
- Det var kjempemoro. Eg trur vi kan overraske i år, seier Ruben Holsæter.
- Fin blanding unge og rutinerte
19-åringen har vore ein svært viktig spelar for Knut Erik Folland i dei to første kampane: Med mål både mot Asker og Notodden, har Holsæter verkeleg fått ein pangstart på sesongen.
- Ruben har teke store steg sidan i fjor. Han er ein viktig spelar, og vi har ei fin blanding av unge og rutinerte spelarar, seier trenaren.
- LES OGSÅ:
På topp på tabellen
Sigeren var av det fortente slaget. Etter at Notodden kom best i gang, og hadde det meste av banespelet den første halvtimen, snudde Førde oppgjeret etter 1-0-scoringane. Frå då og fram til det siste kvarteret, var heimelaget best i det meste. Notodden pressa mot slutten, men skapte aldri dei heilt store sjansane.
Førde sine mål kom etter 29 minutt ved Holsæter og eitt minutt ut i andre omgang ved Kim Tangedal.
Etter to serierundar tronar Førde no på tabelltoppen i 2. divisjon.